واشنگٹن ۔23اپریل (اے پی پی):وفاقی وزیر خزانہ سینیٹر محمد اورنگزیب نے واشنگٹن ڈی سی میں آئی ایم ایف-ورلڈ بینک کے موسم بہار کے اجلاس کے موقع پر چین کے وزیر خزانہ لان فوان سے ملاقات کی ۔ملاقات کے دوران وزیر خزانہ سینیٹر اورنگزیب نے اپنے چینی ہم منصب کے ساتھ جولائی 2024 میں بیجنگ میں ہونے والی گزشتہ ملاقات کا تذکرہ کیا۔
انہوں نے پاکستان کی سماجی و معاشی ترقی کے لیے چین کی مستقل حمایت کو سراہا۔وزیر خزانہ نے آئی ایم ایف کے ایکسٹینڈڈ فنڈ فسیلٹی (EFF) کے تحت پاکستان کے اقتصادی اصلاحاتی پروگرام کی بھرپور حمایت پر چین کی حکومت کا شکریہ بھی ادا کیا۔ انہوں نے چینی ہم منصب کو پاکستان میں ٹیکس، توانائی، نجکاری، سرکاری مالیات اور سرکاری اداروں میں کی جانے والی کلیدی اصلاحات اور پانڈا بانڈ کی تازہ صورت حال سے بھی آگاہ کیا۔
انہوں نے پانڈا بانڈ کے اجراء کے عمل کو آگے بڑھانے کے لیے چین کے پیپلز بنک آف چائنا سے تعاون کی درخواست کی۔ وزیر خزانہ نے ملاقات کے اختتام پر چینی وزیر خزانہ کو پاکستان کے دورے کی دعوت دی۔
Short Link: https://urdu.app.com.pk/urdu/?p=586897
