اسلام آباد۔11اگست (اے پی پی):وزیر داخلہ محسن نقوی نے وزارت داخلہ میں ترکیہ کے سفیر ڈاکٹر مہمت پیکاسی سے ملاقات کی۔ ملاقات میں پاک ترکیہ دوطرفہ تعلقات اور باہمی دلچسپی کے امور پر تفصیلی تبادلہ خیال کیا گیا۔ دونوں فریقین نے سیکورٹی، پولیس اور سول آرمڈ فورسز کے شعبوں میں تعاون بڑھانے پر اتفاق کیا۔ ایکسچینج پروگرام کے تحت پاکستانی پولیس افسران کو تربیت کے لیے ترکیہ بھیجنے کا بھی فیصلہ کیا گیا۔اس موقع پر وزیر داخلہ نے کہا کہ رواں سال 14 اگست سے ترکیہ شہری مفت آن لائن ویزا حاصل کر سکیں گے۔
انہوں نے مزید کہا کہ اس اقدام سے ترک بھائیوں اور بہنوں کے لیے پاکستان کا دورہ کرنا بہت آسان ہو جائے گا۔انہوں نے کہا کہ وہ ترکیہ حکومت کی دعوت پر اکتوبر میں ترکیہ کا دورہ کریں گے جہاں باہمی تعاون بڑھانے کے لیے نتیجہ خیز اقدامات تجویز کیے جائیں گے۔وزیر داخلہ نے کہا کہ پاکستانی ترکیہ کو اپنا دوسرا گھر سمجھتے ہیں۔ انہوں نے مزید کہا کہ دونوں ممالک کے درمیان دیرینہ مذہبی، ثقافتی اور تجارتی تعلقات ہیں اور ہم ان تعلقات کو مزید مضبوط بنانے کے خواہاں ہیں۔
ملاقات میں ترکیہ میں قید پاکستانیوں کی رہائی پر بھی تبادلہ خیال کیا گیا اور اس حوالے سے جلد معاہدے کو حتمی شکل دینے پر اتفاق کیا گیا۔ترکیہ کے سفیر ڈاکٹر مہمت پیکاسی نے کہا کہ ترکیہ پاکستان کے ساتھ برادرانہ تعلقات کو بہت اہمیت دیتا ہے اور مختلف شعبوں میں پاکستان کے ساتھ تعاون جاری رکھے گا۔اس موقع پر وفاقی سیکرٹری داخلہ خرم علی آغا اور ایڈیشنل سیکرٹری داخلہ رفعت مختار راجہ بھی موجود تھے۔
Short Link: https://urdu.app.com.pk/urdu/?p=492759
