اسلام آباد۔18نومبر (اے پی پی):وفاقی وزیر برائے دفاعی پیداوار محمد اسرار ترین نے کہا کہ ہمارے ملک نے عالمی مارکیٹ میں بہترین اور ٹیکنالوجی کے لحاظ سے جدید ترین فضائی اور زمینی آلات کی نمائش کی ہے، اس طرح دفاعی شعبے سے متعلق بہت سے شعبوں میں فخر کے ساتھ خود کفالت حاصل کی ہے۔وہ جمعہ کو ایکسپو سینٹر کراچی میں منعقدہ آئیڈیاز 2022 کی اختتامی تقریب سے خطاب کر رہے تھے۔انہوں نے کہا کہ پاکستان ہمیشہ سے اس حقیقت کا خیال رکھتا ہے کہ ہتھیار امن کی سہولت فراہم کرتے ہیں، اس مسابقتی دنیا میں ایک ہم آہنگی اور امن پسند ملک کے طور پر رہنا چاہتا ہے۔
وفاقی وزیر محمد اسرار ترین نے کہا کہ آئیڈیاز 2022 کا مقصد اپنی مصنوعات کی نمائش، بین الاقوامی سطح کے بڑے ایونٹ کی منصوبہ بندی اور انعقاد کے لیے اپنی تنظیمی صلاحیتوں کا مظاہرہ کرنا اور خطے کے سیکیورٹی مسائل پر اپنے خیالات کو پہنچانے کے لیے ایک بہترین بین الاقوامی پلیٹ فارم فراہم کرنا تھا ۔ انہوں نے کہا کہ موجودہ ماحول کے تحت آئیڈیاز 2022 کا کامیابی سے انعقاد پاکستان کی ایک جدید، ترقی پسند اور روادار ریاست کے طور پر امیج بنانے کا مظہر ہے جو عالمی برادری کے ساتھ پرامن طور پر ساتھ رہنے کے لیے تیار ہے۔
ایک سوال کا جواب دیتے ہوئے انہوں نے کہا کہ ہم نے آئیڈیاز 2022 کے انعقاد کے تمام اہداف حاصل کر لیے ہیں۔ 64 ممالک کے تقریباً 285 غیر ملکی دفاعی وفود نے شرکت کی، جس سے نمائش کی اہمیت اور کامیابی کا پتہ چلتا ہے۔ آئیڈیاز 2022 کی سائیڈ لائن پر 30 سے زائد ایم او یوز پر دستخط کیے گئے۔انہوں نے اس بات پر روشنی ڈالی کہ غیر ملکی مندوبین کے زریعے دنیا میں ایک اچھا پیغام جائے گا کہ پاکستان ایک پرامن ملک ہے اور انتہائی منظم انداز میں شاندار تقریب منعقد کرنے کی تنظیمی صلاحیتوں کا حامل ہے۔
اس دوران میجر جنرل محمد عارف ملک نے بھی میڈیا کو بریفنگ دیتے ہوئے مزید کہا کہ پاکستان کئی دہائیوں سے دفاعی پیداوار میں ہے۔آئیڈیاز 2022 میں ہماری کچھ بڑی مقامی طور پر تیار کردہ مصنوعات کی نمائش کی گئی جن میں مین بیٹل ٹینک، الخالد، الضرار، JF-17 تھنڈر فائٹر ایئر کرافٹ، آرمرڈ پرسنل کیریئرز، اور آرمڈ یو اے وی وغیرہ شامل ہیں۔
انہوں نے کہا کہ ہمیں ترکی، چین، شمالی امریکہ، جنوبی امریکہ، یورپ، ایشیا اور مشرق بعید سے آئیڈیاز 2022 کے لیے بہت اچھا رسپانس ملا۔ڈی جی ڈیپو نے کہا کہ ایونٹ کے اثرات بہت زیادہ ہوں گے، یہ ایک جاری عمل ہے اور بڑے سودوں کے لئے معاون و مدد گار ثابت ہوگا ۔بعد ازاں نمائش کنندگان کو سرٹیفکیٹ اور شرکت ایوارڈز سے نواز ا گیا ۔
