ابوظہبی۔16اپریل (اے پی پی):وفاقی وزیر برائے قومی غذائی تحفظ و تحقیق رانا تنویر حسین نے ابوظہبی میں 17 ویں خلیفہ انٹرنیشنل ایوارڈ برائے کھجور اور زرعی جدت کی پروقار تقریب میں شرکت کی۔ متحدہ عرب امارات کے نائب صدر اور نائب وزیر اعظم شیخ منصور بن زید النہیان کی سرپرستی میں امارات پیلس میں منعقد ہونے والی اس تقریب میں زرعی جدت میں عالمی رہنمائوں کو اعزاز سے نوازا گیا جن میں پاکستانی سائنسدان ڈاکٹر غلام سرور مرخند بھی شامل ہیں جنہوں نے”با اثر شخصیت“ کے زمرے میں یہ اعزاز حاصل کیا۔
پاکستانی سفارت خانے کی جانب سے جاری بیان کے مطابق وفاقی وزیر رانا تنویر حسین نے پائیدار زراعت اور بین الاقوامی شراکت داری کو فروغ دینے میں متحدہ عرب امارات کی دور اندیش قیادت کو سراہا۔ انہوں نے پاکستان اور متحدہ عرب امارات کے درمیان مضبوط دوطرفہ تعلقات بالخصوص زرعی تحقیق اور جدت پر زور دیا۔ وفاقی وزیر نے کہا کہ خلیفہ انٹرنیشنل ایوارڈ زرعی ترقی میں بہترین کارکردگی کا حامل اعزاز ہے اور پاکستان کو ڈاکٹر غلام سرور مرخند کی خدمات کے اعتراف پر بہت فخر ہے،
یہ کامیابی پاکستان کی سائنسی تحقیق اور پائیدار کاشتکاری کے عزم کی عکاسی کرتی ہے جو غذائی تحفظ کے چیلنجوں اور موسمیاتی تبدیلیوں سے نمٹنے کے لیے عالمی کوششوں سے ہم آہنگ ہے۔اس موقع پر رواں سال پاکستان میں منعقد ہونے والے دوسرے پاکستان انٹرنیشنل ڈیٹ پام فیسٹیول 2025 کے لیے مفاہمت کی یادداشت (ایم او یو) پر دستخط بھی کئے گئے جس سے دونوں ممالک کے درمیان زرعی تعاون کے ایک نئے باب کا آغاز ہوا۔ وفاقی وزیر رانا تنویر حسین اور خلیفہ انٹرنیشنل ایوارڈ برائے کھجور اور زرعی جدت کے سیکرٹری جنرل پروفیسر ڈاکٹر عبدالوہاب زید نے مفاہمت کی یادداشت پر دستخط کیے۔ شیخ نہیان مبارک النہیان نے کئی قومی اور بین الاقوامی شخصیات کو کھجور کی کاشت اور پیداوار کے شعبے کی ترقی اور پیشرفت کے لیے ان کی شاندار خدمات کو تسلیم کیا ہے۔
اعزاز یافتگان میں متحدہ عرب امارات میں پاکستان کے سفیر فیصل نیاز ترمذی اور پاکستان میں متحدہ عرب امارات کے سفیر حماد عبید ابراہیم سالم الزابی شامل ہیں۔ رانا تنویر حسین کی تقریب میں شرکت نے غذائی تحفظ، موسمیاتی ریزیلینس اور پائیدار کاشتکاری کے طریقوں جیسے اہم چیلنجوں سے نمٹنے کے لیے زرعی جدت کے حوالہ سے پاکستان کی لگن اور یو اے ای کے ساتھ اس کی مضبوط شراکت داری کا اعادہ کیاہے۔
Short Link: https://urdu.app.com.pk/urdu/?p=582891
