اسلام آباد۔29اپریل (اے پی پی):وفاقی وزیر سائنس و ٹیکنالوجی خالد حسین مگسی سے چیک ریپبلک کے سفیر کی قیادت میں اعلیٰ سطحی وفد نے ملاقات کی۔ منگل کو وزارت سائنس و ٹیکنالوجی سے جاری بیان کے مطابق ملاقات میں سائنس اور ٹیکنالوجی کے مختلف شعبوں میں تعاون بڑھانے پر گفتگو کی گئی۔ چیک ریپبلک کے سفیر نے پاکستان میں ابھرتی ہوئی ٹیکنالوجیز کے شعبے میں سکالرشپس دینے کی پیشکش کی جو دونوں ممالک کے درمیان علمی اور تحقیقی تعلقات کے فروغ کی جانب ایک اہم قدم ہے۔ ملاقات میں سائنس، ٹیکنالوجی اور ابھرتی ہوئی سائنسز میں دو طرفہ تعاون بڑھانے پر بھی بات چیت کی گئی۔
وفاقی وزیر نے عالمی انوویشن انڈیکس میں پاکستان کی بہتر درجہ بندی کو خوش آئند قرار دیتے ہوئے کہا کہ پاکستان کی باصلاحیت افرادی قوت دنیا بھر میں اعلیٰ معاوضوں پر کام کررہی ہے۔ اس موقع پر انہوں نے پاکستان کے ٹیکنالوجی کے شعبے میں ترقی اور عالمی سطح پر اس کے مقام کو اجاگر کیا۔ انہوں نے اس بات پر بھی زور دیا کہ پاکستان کی افرادی قوت کی ترقی کے لئے مزید اقدامات کی ضرورت ہے تاکہ عالمی سطح پر ملک کا مزید اچھا مقام حاصل کیا جاسکے۔
خالد حسین مگسی نے ملاقات میں میٹرولوجی کی اہمیت کا ذکر کرتے ہوئے کہا کہ صنعتوں کی ترقی اور معیار کی یقینی بنانے کے لیے اس شعبے کی مضبوطی ضروری ہے۔ انہوں نے چیک ریپبلک کا شکریہ ادا کیا کہ اس نے نوجوان سائنسدانوں اور ٹیکنالوجسٹس کی صلاحیتوں میں اضافے کے لیے پیشکش کی ہے جو دونوں ممالک کے درمیان علم اور ٹیکنالوجی میں تعاون کے نئے دروازے کھولے گا۔
Short Link: https://urdu.app.com.pk/urdu/?p=589339
