اسلام آباد ۔ 11اکتوبر (اے پی پی) وفاقی وزیر سائنس و ٹیکنالوجی چوہدری فواد حسین نے پولیس ناکوں سے نجات کا تکنیکی حل پیش کرنے پر 20 لاکھ روپے کے انعام کا اعلان کیا ہے۔ جمعہ کو اپنے ایک ٹویٹ میں انہوں نے ملک بھر میں تکنیکی تحقیق کے شعبہ سے منسلک ماہرین اور بالخصوص نوجوان طبقہ کو دعوت دی کہ وہ پولیس ناکوں سے نجات کا تکنیکی حل پیش کریں۔ انہوں نے کہا کہ اس حوالے سے بہترین نظریہ پیش کرنے پر 20 لاکھ روپے انعام دیا جائے گا۔ وفاقی وزیر نے اپنے پیغام میں مزید کہا کہ ٹیکنالوجی کے ماہرین3 ہفتے کے اندر اندر اپنی تجاویزوسفارشات پیش کریں۔واضح رہے کہ وفاقی دارالحکومت سمیت ملک بھر کے بڑے شہروں میں اہم شاہرائوں پر ناکے لگائے جاتے ہیں۔ ان ناکوں پر تمام گاڑیوں کی چیکنگ ممکن ہی نہیں تاہم یہ ناکے ٹریفک کی روانی میں خلل ضرور ڈالتے ہیں اور صبح کے اوقات میں ہزاروں سرکاری ونجی ملازمین اور طلبہ کو دفاتر اور تعلیمی اداروںمیں پہنچنے میں تاخیر ہوتی ہے۔اس تاخیر سے نہ صرف دفاتر میں کام کا حرج اور طلبہ کا قیمتی وقت ضائع ہوتا ہے بلکہ ہزاروں گاڑیوں کی رفتار سست ہو جانے کے باعث ان کے دھوئیں سے ماحول کو سخت نقصان پہنچتا ہے اور وقت پر کام کی جگہ اور تعلیمی اداروں میں پہنچنے کے خواہاں ملازمین اور طلبہ کی ایک بڑی تعداد پولیس اور متعلقہ اداروں کی نااہلی کی سزابھگتنے پر مجبور ہوتی ہے۔
