اسلام آباد۔30جون (اے پی پی):وفاقی وزیر برائے انسداد منشیات نوابزادہ شازین بگٹی نے کہا ہے کہ امریکا پاکستان کو انسدادِ منشیات اور سمگلنگ کی روک تھام کے لئے مختلف ٹیکنالوجییز اور گاڑیاں فراہم کرے گا،منشیات کی سمگلنگ کو روکنے کیلئے ڈرون ٹیکنالوجی سے بھی مدد لی جائے گی جس کے لیے مقامی کمپنیوں سے بات چیت جاری ہے۔
ان خیالات کا اظہار انہوں نے جمعرات کوامریکی اسسٹنٹ سیکرٹری آف سٹیٹ ٹوڈ ڈی روبنسن اورپاکستان میں امریکی سفیر ڈونلڈ بلوم سے ملاقات کے دوران کیا۔ملاقات میں انسدادِ منشیات کے حوالے سے باہمی تعاون پر بات چیت ہوئی۔
وفاقی وزیر نے امریکا کی جانب سے انسداد منشیات کی کوششوں کو سراہا۔ انہوں نے کہا کہ منشیات کے استعمال کی روک تھام کیلئے مختلف افراد کو تربیت بھی فراہم کی جائے گی ۔
