اسلام آباد ۔ 4 فروری (اے پی پی) وفاقی وزیر پٹرولیم ڈویژن غلام سرور خان نے کہا ہے کہ کسی سے کوئی ڈیل نہیں ہو گی، مال مسروقہ برآمد کریں گے وہ کہہ رہے ہیں ہمیں معاف کردیں ہم سب کچھ دینے کو تیار ہیں لیکن وہ لوٹا ہوا مال چھپ کر دینا چاہتے ہیں لیکن ہم کہتے ہیں سامنے آکر اقرار کرو۔ان خیالات کا اظہار انہوں نے پیر کو یہاں این اے 59 کے عمائدین کی طرف سے دیے گئے ایک ظہرانے سے خطاب کرتے ہوئے کیا۔ غلام سرور خان نے کہا کہ ملک لوٹنے والوں کا احتساب ہو کر رہے گا، چوروں اور ڈاکوﺅں کا دور ختم ھو چکا، اب انہیں حساب دینا ہوگا اور جیلوں میں جانا ہوگا،دونوں گیس کمپنیاں 142ارب روپے کی مقروض ہیں، اگر قیمتوں میں اضافہ نہ کرتے تو 154 ارب کی مزید مقروض ہو جاتیں ، احتساب سب کا ہو گا ، مرنے والوں کے اکاونٹ سے بھی رقم نکل رہی ہے ، مسلم لیگ نے صرف الیکشن جیتنے کی خاطر 55ارب روپے کی سکیمیں دیں، ایک برس میں50 ارب روپے کی گیس چوری ہوتی ہے۔انہوں نے کہاکہ 1985سے لے کر اب تک (ن) لیگ کے خلاف کھڑا ہوں ،تحریک انصاف نہ بکے گی نہ جھکے گی ،احتساب ہو کر رہے گا۔انہوں نے کہا کہ دونوں جماعتوں کے لیڈر اپنی چوری کے خوف سے ایک دوسرے کے ساتھ اتحاد کر رہے ہیں دونو ں کی چوری نے ملک کو تباہ کیا ہے، 1985 ءسے میں کہ رہا ہوں یہ چور ہیں یہ ڈاکو ہیں۔عوام کو ہاتھ ملانا گوارا نہ کرنے والا عوامی نمائندہ کیسے ہو سکتا ہے،حلف اٹھانے کے بعد پتا چلا ہے کہ عمران خان کو خفیہ ڈیل کی پیش کش ہوئی ہے مگر وہ نہیں مان رہے ہیں، ڈیل ہو گی نہ ڈھیل، احتساب سب کا ہو گا۔پوری فیملی کے اثاثے آمدن سے زیادہ ہیں۔ اس موقع پر انہوں نے تحریک انصاف حلقہ این اے 59 کی سماجی و سیاسی شخصیت ملک نعیم اعوان اور امیرافضل سے اظہار تشکر کیا اور کہاکہ انتخابی مہم کے دوران پی ٹی آئی نے عوام کے ساتھ جو وعدے کئے تھے وہ پورے ہوں گے پہلی گرانٹ روات چک بیلی سمیت حلقے کے عوام پر خرچ کروں گا۔چکری، چونترہ اور روات میں کالج بناوں گا، ریسکیو 1122 کی سہولت کے ساتھ ساتھ ہسپتال بھی بناوں گا۔ انہوں نے کہا کہ اراضی سنٹر کی تعداد میں بھی اضافہ ہو گا تاکہ عوام کہ مشکلات کا ازالہ ہو سکے۔انہوں نے کہا کہ چوہدری نثار علی خان کو عوام نے منتخب کیا اب وہ حلف لینے سے خوف زدہ ہیں عدالت میں کیس ہے جلد فیصلہ ہو جائے گا۔ انہوں نے کہا کہ احتساب کے عمل سے سب کو گزرنا ہوگا دعوے سے کہتا ہوں کہ تحریک انصاف پہلی مرتبہ مخلص قیادت سامنے لائی ہے۔ ہماری نیت بہت صاف ہے.ہمارے چھ ماہ میں کوئی ایک پائی کی بددیانتی ثابت نہیں کرسکتا۔ وزیر پٹرولیم نے مزید کہا کہ سابق حکمرانوں نے ڈرلنگ کے شعبے میں کوئی توجہ نہیں دی۔ 270 ایسے بلاک ہیں جن کے کیس سپریم کورٹ یا ہائیکورٹ میں ہیں لیکن کسی نے ان کی خبر نہ لی۔ 5سال گیس اور پٹرولیم کی امپورٹ پر توجہ مرکوز رکھی گئی۔1280 ارب کے گردشی قرضے حکومت مجبورا برداشت کر رہی ہے۔تحریک انصاف کی حکومت پانچ سال پورا کرے گی اور ہر آنے والا دن پہلے سے بہتر ہو گا.چارٹر آف ڈیموکریسی دراصل چارٹرآف لوٹ مار تھا جو جمہوریت کے نام پر کیا گیا ہے۔
