اسلام آباد۔31جولائی (اے پی پی):ایف پی سی سی آئی کے صدر عاطف اکرام شیخ نے کہا ہے کہ پاکستان اور امریکہ کے درمیان ٹیرف کمی کے حوالے سے تجارتی معاہدہ انتہائی خوش آئند ہے،امریکہ پاکستان کا سب سے بڑا تجارتی پارٹنر ہے، معاہدے سے ملکی برآمدات میں مزید اضافہ ہو گا۔ان خیالات کا اظہار انہوں نے جمعرات کو اپنے ایک بیان میں کیا۔عاطف اکرام شیخ نے کہا کہ پاکستان اور امریکہ کے درمیان ٹیرف کمی کے حوالے سے تجارتی معاہدہ انتہائی خوش آئند ہے، ٹیرف معاہدہ دونوں ممالک کے درمیان دوطرفہ تعاون ،تجارت اور سرمایہ کاری کے مضبوط تعلقات کی عکاسی کرتا ہے۔
انہوں نے کہا کہ بزنس کمیونٹی معاہدے کیلئے وزیراعظم ، فیلڈ مارشل، وزیر خارجہ اور وزیر خزانہ کے کردار کو سراہتی ہے ، امریکا پاکستان کا سب سے بڑا تجارتی پارٹنر ہے، معاہدے سے ملکی برآمدات میں مزید اضافہ ہو گا، معاہدے سے امریکہ میں پاکستانی مصنوعات پر ٹیرف میں کمی، منڈیوں تک بہتر رسائی ملے گی۔
ایف پی سی سی آئی کے صدر نے کہا کہ معاہدہ دونوں ملکوں کے درمیان اہم شعبوں میں اقتصادی تعاون کے نئے دور کے آغاز کا ثابت ہو گا، حکومت کی بہتر پالیسیوں کی بدولت پاکستان کو معاشی محاذ پر بڑی کامیابیاں حاصل ہو رہی ہیں۔عاطف اکرام شیخ نے کہا کہ بزنس کمیونٹی ملکی ترقی کیلئے حکومتی اقدامات کی مکمل حمایت کا اعادہ کرتی ہے۔
