سیالکوٹ۔ 21 اپریل (اے پی پی):پاکستان میں تعینات ایتھوپیا کے سفیر ڈاکٹر جمال بیکر عبداللہ نے سیالکوٹ چیمبر آف کامرس اینڈ انڈسٹری (ایس سی سی آئی) کا دورہ کیا۔ صدر ایس سی سی آئی اکرام الحق،سینئر نائب صدر وسیم شہباز لودھی اور نائب صدر عمر خالدنے معزز مہمانوں کا پرتپاک استقبال کرتے ہوئے انہیں چیمبر آمد پر خوش آمدید کہا۔صدر اکرام الحق نے خطبہ استقبالیہ پیش کرتے ہوئے کہا کہ پاکستان او ایتھوپیا کے درمیان بہترین قریبی تعلقات ہیں جن سے دونوں ممالک کی عوام مستفید ہو رہے ہیں۔
انہوں نے ایتھوپیا اور پاکستان کے درمیان باہمی تجارتی تعلقات کو فروغ دینے کے لیے ہرممکن مخلصانہ کوششیں کرنے کے عزم کا اظہار کرتے ہوئے کہا کہ دونوں ممالک کے درمیان باہمی احترام، افہام و تفہیم، امن اور سماجی و اقتصادی ترقی کے لیے مشترکہ وژن ہے۔ انہوں نے کہا کہ تجارتی وفود کے تبادلے سے دونوں ممالک کے درمیان دوطرفہ تجارتی اور کاروباری تعلقات کو مزید فروغ دینا چاہیے۔اس موقع پر ایتھوپیا کے سفیر ڈاکٹر جمال بیکر عبداللہ نے بھی خطاب کیا اور کہا کہ پاکستان اور ایتھوپیاکے درمیان تجارتی حجم بڑھے گا جو کہ ضروری بھی ہے۔
انہوں نے کہا کہ پاکستان اور ایتھوپیا کے مابین برادرانہ تعلقات ہیں اور ان تعلقات کو باہمی تجارت اور اقتصادی شراکت داری میں نظر آنا چاہیئے۔انہوں نے اگلے ماہ 15سے 17مئی 2025ء کو ایتھوپیا میں شروع ہونے والی پانچویں پاکستان افریقہ ٹریڈ ڈویلپمنٹ کانفرنس اینڈ سنگل کنٹری نمائش میں زیادہ سے زیادہ بزنس مینوں کو شرکت کی دعوت دی اور کہا کہ اس کانفرنس میں شمولیت سے پاکستانی بزنس مینوں اور بالخصوص سیالکوٹ کی بزنس کمیونٹی کو بہت فائدہ حاصل ہو سکتا ہے جس سے وہ اپنے کاروبار کو بھی وسعت دے سکتے ہیں۔
انہوں نے سیالکوٹ چیمبر آف کامرس اینڈ انڈسٹری کی دستاویزی فلم ”سیالکوٹ دی سٹی آف پروگریسو پیپل” میں بھی گہری دلچسپی ظاہر کی جو اس اجلاس کے دوران دکھائی گئی۔انہوں نے مزید کہا کہ دونوں ممالک خوشگوار تعلقات سے لطف اندوز ہو رہے ہیں جو انتہائی خوش آئند بات ہے۔
اجلاس کے احتتام پر صدر سیالکوٹ چیمبر آف کامرس اینڈ انڈسٹری اکرام الحق کی جانب سے معزز مہمانوں کو سیالکوٹ چیمبر کی یادگاری شیلڈ بھی پیش کی گئی۔چیئرمین یونیورسٹی آف سیالکوٹ ملک فیصل منظور، ڈی جی ٹی ڈیپ سیالکوٹ خالد رسول، سابق صدور سیالکوٹ چیمبر ملک اشرف اور ڈاکٹر خرم، سابق ضلعی ناظم میاں نعیم جاوید سمیت ایگزیکٹو رکن سیالکوٹ چیمبر آف کامرس اعجاز احمد غوری و دیگر بھی اس موقع پر یہاں موجود تھے۔
Short Link: https://urdu.app.com.pk/urdu/?p=585198
