نیو یارک ۔17جولائی (اے پی پی):پاکستان اور دیگر ممالک نے پائیدار ترقی کے اہداف تک پہنچنے کے عزم کی تجدید نو کی ہے اقوام متحدہ کا اعلی سطحی سیاسی فورم برائے پائیدار ترقی(ایچ ایل پی ایف)نیویارک میں اقوام متحدہ کے ہیڈ کوارٹر میں اختتام پذیر ہو گیا، مندوبین نے2030 تک پائیدار ترقیاتی اہداف اور غربت کے خاتمے تک پہنچنے کے لیے جوش، جذبے اور اعلیٰ توانائی کا مظاہرہ کیا۔54 رکنی باڈی کے صدر، کولن کیلاپائل نے کہاکہ ہم نے اقتصادی اور سماجی کونسل( ای سی او ایس او سی )کے اہم پروگرام کو آگے بڑھایا ہے اور ایچ ایل پی ایف اور ای سی او ایس او سی کو مضبوط بنانے کے بارے میں قراردادوں میں جنرل اسمبلی کے فیصلوں پر عمل درآمد کے لیے ٹھوس بنیادی کارروائی شروع کی ہے ۔
اس فورم میں تقریبا 40 سربراہان مملکت سمیت 100 سے زیادہ اعلیٰ سطحی مندوبین نے دو ہفتے کے عرصے میں ہونے والی بات چیت میں حصہ لیا، اور کسی کو پیچھے نہ چھوڑنے کے اپنے عزم کا اعادہ کیا۔ پاکستان کے وفد کی قیادت وزیر منصوبہ بندی احسن اقبال کر رہے تھے، جنہوں نے پائیدار ترقی کے اہداف کو پورا کرنے کے لیے اپنی حکومت کے عزم کا اظہار کیا جس کا مقصد غربت، عالمی غذائی عدم تحفظ اور پانی کی کمی جیسے چیلنجوں سے نمٹنا ہے۔
ای سی او ایس او سی کے صدر کیلاپائیل جو اقوام متحدہ میں بوٹسوانا کے سفیر ہیں انہوں نے پنے اختتامی بیان میں کہا کہ اگرچہ کوویڈ وبائی بیماری جاری ہے تاہم اس کے باوجودہم بحالی کی راہ پر گامزن ہیں اور آج کے خوفناک چیلنجوں اور بحرانوں سے آگے کی طرف دیکھ رہے ہیں۔
انہوں نے کہا کہ پائیدار ترقی کے اہداف تک پہنچنے کے امکانات کے سلسلہ میں ہمیں وبائی امراض کے منفی اثرات کو تبدیل کرنا؛ سماجی، اقتصادی اور مالیاتی نظام کو تبدیل کرنا؛ خوراک کی حفاظت اور توانائی کی فراہمی پر یوکرین میں جنگ کے اثرات کو حل کرناہو گا ۔ ای سی او ایس او سی کے صدر نے مزید کہا کہ موسمیاتی تبدیلی، آلودگی اور حیاتیاتی تنوع کے نقصان کو روکنا ایک ایسی دعوت ہے جس کو حاصل کرنے کے لیے ہمیں بہت زیادہ محنت کرنی چاہیے۔
انہوں نے یاد دلایا کہ ہمارے پاس تمام ضروری سازو سامان اور ذرائع ہیں، لیکن ایک "عالمی خاندان” کے طور پر "یکجہتی کے ساتھ” کام کرنے کی ضرورت ہے۔ کیلاپائل نے کہا کہ نیا وزارتی اعلامیہ، جسے اجلاس نے اتفاق رائے سے اپنایا، "پائیدار ترقی کے 2030 ایجنڈے کو حاصل کرنے کے لیے ایک غیر متزلزل عزم” فراہم کرتا ہے۔
انہوں نے ایچ ایل پی ایف کے کچھ اہم پیغامات کا اشتراک بھی کیا ۔ای سی او ایس او سی کے صدر نے بین الاقوامی قرضوں اور ٹیکس کے ڈھانچے میں اصلاحات کے ذریعے مالیاتی فرق کو پر کرنے کی ضرورت کے بارے میں بات کی۔انہوں نے اس بات پر بھی زور دیا کہ تعلیم "ایک انسانی حق اور ایک عام عوامی بھلائی ہے، نہ کہ کوئی استحقاق،” انہوں نے کہا کہ ستمبر میں آنے والی ٹرانسفارمنگ ایجوکیشن سمٹ پائیدار ترقی کے ہدف نمبر4 کی راہ میں حائل رکاوٹوں کو کرے گی ۔
کیلاپائل نے یاد دلایا کہ کسی بھی ملک نے صنفی مساوات حاصل نہیں کی ہے اور خواتین اور لڑکیوں کی ضروریات کو "زیادہ جامع طور پر” حل کیا جانا چاہیے تاکہ خواتین کے خلاف تشدد کا خاتمہ اور قومی صنفی بجٹ کو لاگو کرنا شامل ہو۔اس کے بعد انہوں نے "2030 کے ایجنڈے پر جامع طور پر عمل دروآمد اور نظرثانی” کے لیے مقامی حکام کو شامل کرنے کی اہمیت پر زور دیا ۔
انہوں نے کہا کہ ہمارے اتحاد کو وزارتی اعلامیہ میں بڑی تفصیل سے بیان کیا گیا ہے، اور میں آپ کو اس کامیابی پر مبارکباد پیش کرتا ہوں۔ مجھے خوشی ہے کہ 2015 میں ہم نے جو اہداف مقرر کیے تھے ان کی تکمیل کے لیے مضبوط عزم اب بھی متحرک ہے۔
