اسلام آباد۔9اپریل (اے پی پی):پاکستان اور قازقستان نےتعلیمی و سائنسی روابط، تحقیق و ترقی اور ٹیکنالوجی کے شعبے میں تعاون کو وسعت دینے پر اتفاق کیا ہے۔وفاقی وزیر سائنس وٹیکنالوجی خالد حسین مگسی سے قازقستان کے سفیر نے بدھ کو یہاں ملاقات کی۔وزارت سائنس و ٹیکنالوجی کی جانب سے جاری اعلامیہ کے مطابق ملاقات کے دوران پاکستان اور قازقستان کے درمیان دوطرفہ تعاون کو فروغ دینے کے مختلف پہلوؤں پر تفصیلی تبادلہ خیال کیا گیا اورتعلیمی و سائنسی روابط، تحقیق و ترقی، اور ٹیکنالوجی کے شعبے میں تعاون کو وسعت دینے پر زور دیا گیا۔
اس موقع پر قازقستان کے سفیر نے کہا کہ قازقستان جلد ہی ترکمانستان۔افغانستان۔پاکستان۔انڈیا (تاپی) گیس پائپ لائن منصوبے میں اپنی شمولیت کا باقاعدہ اعلان کرے گاجو خطے میں توانائی کے شعبے میں اشتراک اور اقتصادی تعاون کے ایک نئے دور کا آغاز ہوگا۔خالد حسین مگسی نےکہا کہ دونوں ممالک کے درمیان جلد تعلیمی مفاہمتی یادداشتوں پر دستخط کئے جائیں گے۔
قازقستان کے سفیر نے نیشنل یونیورسٹی آف سائنس اینڈ ٹیکنالوجی (نسٹ) اسلام آباد میں ایک تحقیقی مرکز قائم کرنے میں بھی دلچسپی کا اظہار کیا۔ فریقین نے کاروباری ماحول کو بہتر بنانے، سمگلنگ کے خلاف مشترکہ اقدامات اور تعلیم وٹیکنالوجی کے شعبوں میں تعاون کو مزید وسعت دینے پربھی اتفاق کیا۔
Short Link: https://urdu.app.com.pk/urdu/?p=579846
