پاکستان اور چین کے درمیان خلائی شعبے میں تعاون اہم سنگ میل ہے، حکومت کی خلائی تحقیق کے شعبے کی ترقی پر خصوصی توجہ مرکوز ہے، عطاء اللہ تارڑ

اسلام آباد۔28فروری (اے پی پی):وفاقی وزیر اطلاعات، نشریات، قومی ورثہ و ثقافت عطاء اللہ تارڑ نے پاکستان اور چین کے درمیان خلائی شعبے میں تعاون کو اہم سنگ میل قرار دیتے ہوئے کہا ہے کہ وزیراعظم شہباز شریف کی قیادت میں حکومت کی خلائی تحقیق کے شعبے کی ترقی پر خصوصی توجہ مرکوز ہے۔

یہ بات انہوں نے جمعہ کو یہاں وزیراعظم ہائوس میں پاکستان اور چین کے درمیان خلائی تحقیق میں تعاون کے سمجھوتے کی دستاویز کے تبادلے کی تقریب کے موقع پر گفتگو کرتے ہوئے کہی۔ وفاقی وزیر اطلاعات نے کہا کہ پاکستان کے پہلے مینڈ سپیس مشن کے حوالے سے چین کی سپیس ایجنسی اور سپارکو کے درمیان معاہدہ ایک اہم سنگ میل ہے جس پر چین کی حکومت کے شکر گزار ہیں۔ انہوں نے کہا کہ وزیراعظم کے وژن کی روشنی میں سپارکو کے اقدامات قابل تعریف ہیں۔

وفاقی وزیر نے کہا کہ پاکستان اور چین کے درمیان خلائی شعبے میں تعاون قابل فخر ہے، خلائی تحقیق میں تعاون سے چین کے خلا باز پاکستانی خلا بازوں کو تربیت فراہم کریں گے۔ ان شاء اللہ ایک سال کی مدت میں پاکستانی خلاباز چائنیز سپیس سٹیشن میں سفر کر سکیں گے۔

انہوں نے کہا کہ وزیراعظم شہباز شریف کی قیادت میں حکومت کی خلائی تحقیق کے شعبے کی ترقی پر خصوصی توجہ مرکوز ہے۔ ان شاء اللہ پاکستان کا سبز ہلالی پرچم خلا۔میں بھی جائے گا۔یہ بہت بڑی کامیابی ہے جس پر ہم اپنے چینی دوستوں کے شکر گذار ہیں۔

Short Link: https://urdu.app.com.pk/urdu/?p=567368