اسلام آباد۔15اکتوبر (اے پی پی):وفاقی وزیر آبی وسائل سید خورشید شاہ نے ایٹمی اثاثوں سے متعلق امریکی صدر جوبائیڈن کے بیان کو مسترد کرتے ہوئے کہا ہے کہ پاکستان ذمہ دار ترین ایٹمی طاقت، کبھی اپنے اثاثوں کا غلط استعمال نہیں کیا۔ہفتہ کو پاکستان کو دنیا کا خطرناک ترین ملک قرار دینے کے امریکی صدر جوبائیڈن کے بیان پر اپنےردعمل میں وفاقی وزیر خورشید شاہ نے ایٹمی اثاثوں سے متعلق امریکی صدر کے خدشات مسترد کرتے ہوئے کہاکہ دو ارب مسلمانوں کی دنیا میں پاکستان واحد اسلامی ایٹمی ریاست ہے،امریکی صدر کا پاکستان کے خلاف ایسی بات کرنا دراصل مسلمانوں پر عدم اعتماد ہے۔
خورشید شاہ نے کہا کہ پاکستان ذمہ دار ترین ایٹمی طاقت، کبھی اپنے اثاثوں کا غلط استعمال نہیں کیا۔اتنی بڑی جوہری طاقت کے باوجود پاکستان نے ہمیشہ ہندوستان کے ساتھ صبر و تحمل سے گزارہ کیا۔خورشید شاہ نے کہا کہ پاکستان کے اندر عمران خان بیرونی طاقتوں کے ایجنڈے پر ہے،عمران خان کا اصل ایجنڈا بھی ایٹمی طاقت کو ختم کرنا ہے۔یہ یہودی ایجنڈا ہے، قوم کو اس کا احساس ہونا چاہیے،اسی ایجنڈے کے تحت عمران خان پاکستان کو عدم استحکام کا شکار کرنے میں مصروف ہے۔
خورشید شاہ نے کہا کہ 16 اکتوبر کے ضمنی الیکشن ریفرنڈم ہیں،عوام کو فیصلہ کرنا ہے کہ پاکستان کی معیشت، سالمیت کی جنگ لڑنی یا گالم گلوچ،جھوٹ کی سیاست کا حصہ بننا،الیکشن صاف شفاف ہوں گے، جو نتیجہ آئے سب تسلیم کریں،یہ عمران خان کی نشستیں تھیں، اگر وہ تین چار بھی ہار جاتا تو اس کی شکست ہو گی،عمران خان اپنا جرم تسلیم کر چکا کہ وہ کٹھ پتلی تھا،قوم اس کٹھ پتلی کو مسترد کر دے۔
خورشید شاہ نے اعتزاز احسن کے بیان پر بھی تنقید کرتے ہوئے کہاکہ بے شک اعتزاز کی ذاتی رائے مگر سینئر رہنما کو غلط بات کا احساس کرنا چاہیے،پارٹی نے بھی اعتزاز احسن کے بیان کا نوٹس لیا،اعتزاز احسن جانتا ہے، کیسز جھوٹے تھے، وہ میرے خلاف بنائے کیسز کی حقیقت بھی جانتا ہے،ایسی بات نہیں کہنی چاہیے جس میں کوئی حقیقت نہ ہو۔
