پاکستان مختلف مذاہب کی برادریوں کا حسین امتزاج ہے،وزیراعلی مریم نواز کا ہولی تہوار پر خصوصی پیغام

لاہور۔14مارچ (اے پی پی):وزیراعلی پنجاب مریم نواز نے کہا ہے کہ پاکستان مختلف مذاہب کی برادریوں کا حسین امتزاج ہے، سب کو یکساں حقوق و مواقع میسر ہیں، پنجاب صوفیا، محبت رواداری کی دھرتی اور ہر مذہب و برادری کو مکمل احترام حاصل ہے۔

وزیراعلی مریم نواز نے ہولی تہوار پر اپنے خصوصی پیغام میں کہا کہ رنگوں کا خوبصورت تہوار ہولی محبت، امن اور بھائی چارے کی علامت ہے،پنجاب حکومت اقلیتوں کے مذہبی اور ثقافتی تہواروں کو سرکاری سطح پر منانے کا بھی اہتمام کر رہی ہے،اقلیتی برادری کے افراد کو تعلیم، صحت، روزگار اور دیگر بنیادی سہولیات یکساں طور پر فراہم کی جارہی ہیں۔

وزیراعلی نے کہا کہ اقلیتی برادری سے تعلق رکھنے والے نادار بہن بھائیوں کی مالی معاونت کیلئے منیارٹی کارڈ پروگرام شروع کیا ہے، حکومت پنجاب اقلیتوں کے تحفظ اور فلاح و بہبود کے لیے عملی اقدامات کر رہی ہے، ایسا پنجاب بنا رہے ہیں جہاں ہر شہری خود کو محفوظ، بااختیار اور برابر کا پاکستانی محسوس کرے، اقلیتوں کے مذہبی تہواروں کے لئے گرانٹس میں اضافہ کیا گیا ہے۔وزیراعلی نے کہا کہ اقلیتوں کے مال و جان کے تحفظ کو ریڈ لائن قرار دے کر یقینی بنایا جارہا ہے، دعا ہے یہ دن سب کے لیے خوشیوں، محبت اور بین المذاہب ہم آہنگی کا پیغام لے کر آئے۔

Short Link: https://urdu.app.com.pk/urdu/?p=572693