اسلام آباد۔18اپریل (اے پی پی):پاکستان ٹیلی کمیونیکیشن اتھارٹی (پی ٹی اے) کی جانب سے ملک میں ڈیٹا سروسز کی فراہمی کے لیے مقرر کردہ کلاس لائسنس کے تحت ورچوئل پرائیویٹ نیٹ ورک (وی پی این) سروس فراہم کنندگان کو لائسنس جاری کرنے کا عمل جاری ہے۔اس عمل کے تحت، پی ٹی اے کی طرف سے اب تک تین کمپنیوں کو وی پی این سروسز کی فراہمی کے لیے کلاس لائسنس کا اجراء کیا جا چکا ہے۔
جمعہ کو پاکستان ٹیلی کمیونیکیشن اتھارٹی سے جاری بیان کے مطابق ایسے تمام وی پی این سروس فراہم کنندگان جو بغیر لائسنس کے کام کر رہے ہیں، انہیں کہا جاتا ہے کہ وہ فوری طور پر مطلوبہ کلاس لائسنس کا حصول ممکن بنائیں تاکہ موجودہ ریگولیٹری فریم ورک کی مکمل پاسداری یقینی بنائی جا سکے۔ بروقت لائسنس کے حصول کے ذریعے سروس میں تعطل سے بچا جا سکتا ہے اور صارفین کو بغیر کسی رکاوٹ کے خدمات کی فراہمی ممکن ہو سکے گی۔
واضح رہے کہ لائسنسنگ کے عمل، اہلیت کے معیار، اور درخواست فارم سے متعلق تفصیلی معلومات پی ٹی اے کی ویب سائٹ www.pta.gov.pkپر دستیاب ہیں۔
Short Link: https://urdu.app.com.pk/urdu/?p=584336
