اسلام آباد۔8اپریل (اے پی پی):وزیرِ اعظم محمد شہباز شریف نے کہا ہے کہ پاکستان کی ترقی کیلئے بلوچستان کی ترقی انتہائی اہمیت کی حامل ہے ،بلوچستان کی باصلاحیت افرادی قوت ملک کا قیمتی اثاثہ ہے،بلوچستان کی ترقی کے اقدامات جاری رہیں گے۔ وزیراعظم آفس کے میڈیا ونگ سے جاری بیان کے مطابق انہوں نے ان خیالات کا اظہار بلوچستان کے وکلاء کی اعلی سطحی قیادت سے ملاقات کے دوران گفتگو کرتے ہوئے کیا۔
ملاقات میں وفاقی وزیرِ قانون و انصاف اعظم نذیر تارڑ، صدر سپریم کورٹ بار ایسوسی ایشن رؤف عطاء، صدر بلوچستان ہائی کورٹ بار ایسوسی ایشن عطاء اللہ لانگو اور رکن بلوچستان بار کونسل خلیل کاکڑ موجود تھے۔ اجلاس میں بلوچستان کی موجودہ امن و امان و سکیورٹی کی صورتحال پر تبادلہ خیال کیا گیا۔وزیراعظم نے کہا کہ پاکستان کی ترقی کیلئے بلوچستان کی ترقی انتہائی اہمیت کی حامل ہے،بلوچستان کی باصلاحیت افرادی قوت پاکستان کا قیمتی اثاثہ ہے،حکومت کے بلوچستان کی ترقی کے اقدامات یونہی جاری و ساری رہیں گے۔وفد نے وزیرِ اعظم سے درخواست کی کہ وفاقی حکومت بلوچستان میں امن و امان کی صورتحال کی بہتری کیلئے مؤثر کردار ادا کرے، اس حوالے سے وفد نے بلوچستان میں قانونی کاروائیوں کے ساتھ ساتھ سیاسی و قبائلی قیادت سے مشاورت کو کلیدی اہمیت کا حامل قرار دیا۔
وفد نے وزیرِ اعظم کو اس حوالے سے دیگر سیاسی قیادت و رہنماؤں سے اپنی ملاقاتوں سے بھی آگاہ کیا،صدر سپریم کورٹ بار اور صدر بلوچستان ہائی کورٹ بار نے وزیرِ اعظم کو بلوچستان میں گورننس کے امور کے حوالے سے آگاہی دیتے ہوئے تمام مسائل کے حل کیلئے وزیرِ اعظم کی قیادت و رہنمائی کی درخواست کی۔ وفد نے وزیرِ اعظم کے بلوچستان کی ترقی کو ترجیح دینے اور بلوچستان کے عوام کی فلاح و بہبود کیلئے وفاق کی جانب سے اقدامات پر وزیرِ اعظم کو خراج تحسین پیش کیا۔
وفد نے وزیرِ اعظم کے دانش اسکولز کے ذریعے معاشی طور پر کمزور طبقے کے طلباء و طالبات کو اعلی تعلیم کی فراہمی کے اقدام کی تعریف کی اور خانزئی اور منگوچر قلات میں بھی دانش سکولوں کے قیام کی درخواست کی۔ وفد نے وزیرِ اعظم کے بلوچستان کے طلباء کو اعلی تعلیم کی فراہمی کیلئے ماضی میں دیئے گئے سینکڑوں اسکالر شپس پر خراج تحسین پیش کیا اور اس پروگرام کو دوبارہ سے شروع کرنے کی درخواست کی۔ وزیرِ اعظم نے متعلقہ حکام کو اس حوالے سے فوری عملدرآمد کی ہدایات دیں۔
Short Link: https://urdu.app.com.pk/urdu/?p=579641
