نئی دہلی۔12نومبر (اے پی پی):پاکستانی زائرین کے وفد نے درگاہ حضرت نظام الدین اولیا پر حاضری دی اور ان کے مزار پر چادر چڑھائی۔ پاکستان ہائی کمیشن کی جانب سے جاری پریس ریلیز کے مطابق 147 افراد پر مشتمل پاکستانی زائرین کے وفد نے ناظم الامور آفتاب حسن خان اور بھارت میں پاکستانی ہائی کمیشن کے سفارتی عملہ کے ہمراہ نئی دہلی میں حضرت نظام الدین اولیا کے مزار پر حاضری دی اور روایتی چادر چڑھائی۔
زائرین کے اس وفد کی قیادت وزارت مذہبی اور اور بین المذاہب ہم آہنگی کے آفیسر مقیط احسن کر رہے ہیں۔ یہ وفد 7 سے 13 نومبر تک نئی دہلی میں حضرت نظام الدین اولیا کے 719ویں عرس مبارک میں شرکت کیلئے نئی دہلی میں موجود ہے ۔ درگاہ شریف آمد پر سجادہ نشین دیوان سید طاہر نظامی اور درگاہ کمیٹی کے ارکان نے وفد کا استقبال کیا۔ اس موقع پر وفد نے مزار پر چادر چڑھانے کے بعد پاکستان کی سلامتی اور خوشحالی کیلئے خصوصی دعا کی۔
سجادہ نشین دیوان سید طاہر نظامی نے اس موقع پر ناظم الامور اور زائرین کے گروپ لیڈر کی دستار بندی بھی کی۔ زائرین نے درگاہ کے احاطہ میں واقع حضرت امیر خسرو کے مزار پر بھی حاضری دی اور دعا کی۔ چشتیاں سلسلہ کے چودھویں صدی کے صوفی بزرگ حضرت نظام الدین اولیا کا عرس ہر سال روایتی جوش وخروش کے ساتھ منایا جاتا ہے۔
ان کے عرس میں دنیا کے مختلف ممالک سے عقیدت مند شرکت کرتے ہیں۔ پاکستانی زائرین 1974 کے بھارت پاکستان کے پروٹوکول فریم ورک کے تحت سالانہ عرس میں شریک ہو رہے ہیں۔ پاکستانی زائرین کے گروپ نے قبل ازیں نئی دہلی میں پاکستانی ہائی کمیشن میں ناظم الامور سے ملاقا ت کی اور دورہ کے دوران انہیں سہولیات کی فراہمی پر حکومت پاکستان اور ہائی کمیشن کا شکریہ ادا کیا۔
Short Link: https://urdu.app.com.pk/urdu/?p=336930
