پاکستانی قوم اپنے ملک کی سلامتی، خودمختاری اور جغرافیائی سرحدوں کی حفاظت کے لیے کسی بھی قربانی سے دریغ نہیں کرے گی، حیربیار خان ڈومکی

کوئٹہ۔ 28 اپریل (اے پی پی):معروف سیاسی و قبائلی شخصیت سردار زادہ میر حیربیار خان ڈومکی نے کہا ہے کہ بھارت کی جانب سے بغیر کسی مستند اور ناقابل تردید ثبوت کے پاکستان پر بے بنیاد الزامات عائد کرنا نہایت ہی غیر ذمہ دارانہ، اشتعال انگیز اور افسوسناک عمل ہے، جس کی جتنی بھی مذمت کی جائے کم ہے بھارت کی جانب سے سندھ طاس معاہدے جیسے بین الاقوامی سطح پر تسلیم شدہ اور دہائیوں پر محیط معاہدے کو یکطرفہ طور پر معطل کرنے کی کوشش عالمی قوانین، اقوام متحدہ کے چارٹر، اور بین الاقوامی معاہداتی روایات کی سنگین خلاف ورزی ہے، جو کہ امن دوست عالمی برادری کے لیے باعث تشویش ہونا چاہیے سردار زادہ میر حیر بیار خان ڈومکی نے کہا کہ پاکستان کی بہادر اور عظیم افواج نے گزشتہ کئی دہائیوں کے دوران دہشت گردی کے خلاف نہ صرف بے مثال قربانیاں دی ہیں بلکہ دنیا کو یہ باور کرایا ہے کہ پاکستانی قوم اپنے ملک کی سلامتی، خودمختاری اور جغرافیائی سرحدوں کی حفاظت کے لیے کسی بھی قربانی سے دریغ نہیں کرے گی پاکستان کا ہر شہری مادر وطن کی عزت، وقار اور تحفظ کی خاطر متحد ہے اور وطن کے پرچم تلے سینہ تان کر اپنی افواج کے شانہ بشانہ کھڑا ہے۔

سردار زادہ میر حیربیار خان ڈومکی نے بھارت کو دو ٹوک پیغام دیتے ہوئے کہا کہ بھارت کسی خوش فہمی یا غلط اندازے کا شکار نہ ہو، کیونکہ پاکستان ایک مضبوط، مستحکم اور جدید ایٹمی طاقت ہے، جو کسی بھی جارحیت کا منہ توڑ جواب دینے کی بھرپور صلاحیت رکھتا ہے۔ انہوں نے عالمی برادری، اقوام متحدہ، سلامتی کونسل اور انسانی حقوق کی بین الاقوامی تنظیموں سے مطالبہ کیا کہ وہ بھارت کے اس غیر ذمہ دارانہ، جارحانہ اور امن دشمن رویے کا فوری اور سنجیدگی سے نوٹس لیں تاکہ خطے میں پائیدار امن، استحکام اور سلامتی کو یقینی بنایا جا سکے۔

سردار زادہ میر حیربیار خان ڈومکی نے کہا کہ پاکستان کی عوام دشمن قوتوں کی ہر سازش، پروپیگنڈہ اور جارحانہ عزائم کو ناکام بنانے کے لیے ہمہ وقت تیار اور متحد ہے، اور پوری قوم دشمن کے خلاف سیسہ پلائی ہوئی دیوار کی مانند اپنی عظیم افواج کے ساتھ کھڑی ہے۔

Short Link: https://urdu.app.com.pk/urdu/?p=588828