پشاور۔ 02 ستمبر (اے پی پی):پشاور کے تھانہ خزانہ پولس نے تین روز کے اندر اندر جدید سائنسی خطوط پر جامع تفتیش کے دوران ننھی پری عائشہ کے سفاک قاتلوں کو گرفتار کر لیا۔ پولیس کے مطابق 29 اگست کو خزانہ کے علاقہ شاہ عالم افغان مہاجر کیمپ سے 6 سالہ بچی طفلکہ عائشہ دختر فضل شر لاپتہ ہوئی تھی جس کی اگلے روز گھر سے کچھ ہی فاصلے پر پھانسی شدہ لاش برآمد ہوئی تھی۔ عائشہ کے چچا مسمی صابر کی مدعیت میں مقدمہ تھانہ خزانہ مقدمہ درج کر دیا گیا۔
واقعہ کا سی سی پی او پشاور سید اشفاق انور نے سختی سے نوٹس لیتے ہوئے ایس ایس پی آپریشن کاشف آفتاب عباسی اور ایس ایس پی انویسٹیگیشن اشفاق خان کی نگرانی میں ایس پی رورل ڈویژن ظفر احمد خان، ایس پی انوسٹی گیشن شکیل خان ،ڈی ایس پی رورل امجد خان ، ڈی ایس پی رورل انویسٹیگیشن توحید خان پر مشتمل خصوصی ٹیمیں تشکیل دے دی گئیں جنہوں نےجدید سائنسی خطوط پر تفتیش کرتے ہوئے شامل تفتیش رشتہ داروں کے بیانات میں تضاد کو بنیاد بناتے ہوئے 3 روز ميں نہ صرف اندھے قتل کا سراغ لگا لیا بلکہ درندہ صفت ملزمان کامران ولد جمیل اور امان اللہ ولد غلام سخی کو بھی حراست میں لیا گیا۔
ملزمان اور مقتولہ بچی سے ڈی این اے سمپل حاصل کرکے کراس میچ کےلیے بھجوائے گئے ہیں۔ملزمان ميں سے ایک ملزم کامران مقتولہ کا قریبی رشتہ دار ہے۔ گرفتار دونوں ملزمان نے ابتدائی تفتیش کے دوران اپنے جرم کا اعتراف کر لیا ہے.
Short Link: https://urdu.app.com.pk/urdu/?p=385520
