لاہور۔5مئی (اے پی پی):پنجاب اسمبلی میں بھارت کی جانب سے آبی جارحیت اور سندھ طاس معاہدہ معطل کرنے کے خلاف مذمتی قرارداد جمع ۔ قرارداد مسلم لیگ (ن) کی رکن اسمبلی حنا پرویز بٹ کی جانب سے جمع کروائی گئی۔ قرارداد کے متن میں کہا گیا ہے کہ یہ ایوان بھارت کی جانب سے سندھ طاس معاہدے کو معطل کرنے کی شدید الفاظ میں مذمت کرتا ہے۔ بھارت عالمی بینک کی ثالثی میں طے پانے والے اس بین الاقوامی معاہدے کو ازخود معطل کرنے کا مجاز نہیں۔
قرارداد میں مزید کہا گیا ہے کہ بھارت پہلگام واقعہ کو بنیاد بنا کر آبی جارحیت کا مظاہرہ کر رہا ہے، جو کہ قابل قبول نہیں۔ پاکستان ایک ذمہ دار اور خودمختار ریاست ہے اور اپنی سالمیت اور خودمختاری پر کوئی سمجھوتہ نہیں کرے گا۔ اگر بھارت کی جانب سے پاکستان میں کسی قسم کی دراندازی کی کوشش کی گئی تو پاک فوج اس کا بھرپور جواب دے گی۔ یہ ایوان افواجِ پاکستان کے شانہ بشانہ کھڑا ہے اور ملک کے دفاع کے لیے ہر سطح پر متحد ہے۔
Short Link: https://urdu.app.com.pk/urdu/?p=593041
