فیصل آباد۔ 07 اگست (اے پی پی):پنجاب فوڈ اتھارٹی کا جعلساز مافیا کے خلاف گرینڈ آپریشن جاری ہے۔ڈی جی فوڈ اتھارٹی کی ہدایت پر فوڈ سیفٹی ٹیموں نے لاہور روڈ اور ہجویری ٹاؤن میں کریک ڈاؤن کرکے1200 کلو مردہ مرغیاں تلف، 500 پیکٹ گٹکا ضبط، 2 مقدمات درج کرکے 2 ملزم گرفتارکرادیئے۔ڈپٹی ڈائریکٹر آپریشنز قاسم رضا نے بتایا کہ لاہور روڈ کھڑیانوالہ میں ماناوالہ سے فیصل آباد مردہ مرغیوں کی ترسیل ناکام بنا کر ملزم کو گرفتار کرا دیا گیا۔
انہوں نے بتایا کہ ہجویری ٹاؤن میں کریانہ سٹور سے ممنوعہ گٹکا ضبط کر کے سٹور مالک کیخلاف مقدمہ درج کرا کر گرفتار کرایا گیا۔گاڑی نمبر 6303 سے برآمد ہونے والی مردہ مرغیاں مختلف ہوٹلز اور فاسٹ فوڈ پوائنٹس پر سپلائی کی جانی تھیں۔ ملزم کے پاس لازم ریکارڈ اور ضروری دستاویزات عدم موجود پائی گئیں۔انہوں نے بتایا کہ مردہ مرغیاں اور گٹکا کا استعمال کینسر، آنتوں اور دیگر امراض میں مبتلا کرتا ہے۔انہوں نے کہا کہ غیر معیاری مضر صحت اشیاء کی ترسیل کرنے والے عناصر کی سرکوبی کیلئے ٹیمیں متحرک ہیں۔
Short Link: https://urdu.app.com.pk/urdu/?p=491630
