لاہور۔ 04 اکتوبر (اے پی پی):پنجاب میں کھجور کی کاشت کا رقبہ 90ہزارہیکٹراورپیداوار630 ہزار ٹن تک پہنچ گئی ہے جبکہ کھجورکے درخت کی اوسط عمر 150سال تک ہوگئی ہے جس کی کاشت گزشتہ 5ہزار سال سے انتہائی کامیابی سے جاری ہے لہٰذا باغبان زیادہ سے زیادہ رقبہ پر کھجورکاشت کرکے بہترین پیداوار حاصل کرسکتے ہیں۔ڈیٹ پام ریسرچ انسٹیٹیوٹ ایوب زرعی تحقیقاتی ادارہ فیصل آباد کے ماہرین اثمارنے بتایا کہ پنجاب میں کھجورکی کاشت سے630 ہزار ٹن تک سالانہ پیداوار حاصل کی جاتی ہے جبکہ اس کی اوسط پیداوار فی پو دا اڑھائی سے3 من تک ہوتی ہے۔
انہوں نے بتایاکہ کھجورکی فصل کیلئے خشک اور گرم مرطوب آب و ہوا کی ضرورت ہوتی ہے جس میں گرمی کی شدت زیادہ اور نمی کم ہونی چاہیے۔ انہوں نے کہاکہ کھجورکی فصل میں سیم و تھور برداشت کرنے کی بھی صلاحیت ہوتی ہے۔ انہوں نے کہاکہ کھجور انسانی جسم میں نئے خلیوں کو شفاف خون فراہم کرنے اور خون کی تیاری میں بھرپورمدد فراہم کرتی ہے جس میں میگنیشیم، کیلشیم، آئرن، فاسفورس اور دیگر معدنیات، وٹامن اے، بی، سی و لحمیات اور 70سے75فیصد تک نشاستہ کے اجزا پائے جاتے ہیں۔
انہوں نے بتایاکہ پاکستان آسٹریلیا، بنگلہ دیش، کینیڈا، یونان، ڈنمارک، بھارت، جرمنی،نیپال، سپین،سری لنکا، امریکہ، فرانس، برطانیہ سمیت کئی دیگر ممالک کو کھجوربرآمد کرہاہے۔ انہوں نے کہاکہ باغبان کھجورکے پودے کا پودے سے فاصلہ 20سے25 فٹ تک رکھیں اورفی ایکڑ پودوں کی تعداد 90سے 110 کے درمیان ہونی چاہیے۔ انہوں نے کہاکہ باغبان مزیدرہنمائی کیلئے ماہرین زراعت کی خدمات سے استفادہ کرسکتے ہیں۔
Short Link: https://urdu.app.com.pk/urdu/?p=508321
