فیصل آباد۔ 17 اکتوبر (اے پی پی):ڈائریکٹر محکمہ زراعت توسیع فیصل آبادچوہدری خالد محمودنے کہا ہے کہ محکمے کے افسران و فیلڈ سٹاف گندم کے کاشتکاروں کوجدیدٹیکنالوجی سے استفادہ کی ترغیب دے رہے ہیں تاکہ اس کی فی ایکڑ زیادہ پیداوار کے حصول سمیت آئندہ سال کےلئے مقرر کردہ پیداواری اہداف کا حصول ممکن بنایا جا سکے۔
ان خیالات کا اظہار انہوں نے اے پی پی سے بات چیت کے دوران کیا۔انہوں نے کہا کہ وطن عزیز کی روز افزوں بڑھتی ہوئی آبادی کے پیش نظر غذائی پیداوار میں خاطر خواہ اضافہ وقت کی اہم ضرورت ہے تاکہ ہم اپنی غذائی ضروریات میں خود کفیل ہو سکیں اور اضافی گندم برآمد کر کے ملک کو قیمتی زر مبادلہ کمانے کے قابل بنایا جا سکے۔
ا ن کا کہنا تھا کہ حکومت محکمہ زراعت کو تمام وسائل فراہم کر رہی ہے لہٰذا وہ بھی کاشتکاروں کو تمام سہولیات کی بہم رسانی یقینی بنارہے ہیں۔ انہوں نے کہا کہ کاشتکاروں کو گندم کی فی ایکڑ پیداوار بڑھانے کےلئے جدید ٹیکنالوجی سے روشناس کروانے کے لیے گاؤں اور تحصیل مراکز کی سطح پر فارمرز ڈیز کا بھی انعقاد کیا جارہاہے، اگر کسی جگہ پر مطلوبہ کھادوں کی دستیابی میں کمی کی شکایت ہو تو فوری طور پر متعلقہ ضلع کے ڈی او زراعت اور ڈی سی سے رابطہ کیا جا سکتا ہے۔
انہوں نے گندم کے کاشتکاروں کو ہدایت کی کہ وہ محکمہ زراعت کے مشوروں کے مطابق جدید ٹیکنالوجی سے استفادہ کریں تاکہ ملک کو غذائی خود کفالت سے ہمکنار کرنے کے ساتھ ساتھ اضافی گندم برآمد کر کے قیمتی زر مبادلہ بھی کمایا جا سکے۔
Short Link: https://urdu.app.com.pk/urdu/?p=514003
