اسلام آباد ۔ 24 اکتوبر (اے پی پی) پولیو کے عالمی دن کے موقع پر معروف کرکٹر وسیم اکرم کو پولیو کے خلاف مہم میں سفیر مقرر کردیا گیا ہے۔ پاکستان کے انسداد پولیو پروگرام کے قومی ایمرجنسی آپریشنز سنٹز سے جاری ہونے والے بیان کے مطابق وسیم اکرم اور کوآرڈینیٹر نے معاہدے پر دستخط کیے۔ اس موقع پر معاون خصوصی برائے صحت ڈاکٹر ظفر مرزا، کنٹری ہیڈ یونیسیف آئدہ گرمائی ملاکو اور عالمی ادارہ صحت کی ڈاکٹر پلیتھا بھی موجود تھے۔ معاہدے کے مطابق وسیم اکرم عوام میں پولیو ویکسین کے بارے میں آگہی کیلئے پروگراموں میں شرکت کریں گے۔ وسیم اکرم پولیو ورکرز کی حوصلہ افزائی کیلئے مختلف پروگراموں میں بھی شرکت کریں گے۔ تقریب سے خطاب کرتے ہوئے ڈاکٹر ظفر مرزا نے کہا کہ بچوں کو پولیو جیسے موذی مرض سے بچانا حکومت کی اولین ترجیحات میں شامل ہے، معاشرے کے تمام مکاتب فکر بشمول مذہبی و سیاسی رہنما، اساتذہ اور ڈاکٹر بچوں کو اس بیماری سے بچانے میں اپنا کردار ادا کریں۔ 2 لاکھ 60 ہزار پولیو ورکرز پاکستان پولیو پروگرام کے اصل ہیروز ہیں جن کی انتھک محنت سے ہی پاکستان عنقریب پولیو سے پاک ملک بنے گا۔ پولیو کے سفیر وسیم اکرم نے کہا کہ دنیا میں پاکستان اور افغانستان 2 ہی ممالک ہیں جہاں پر پولیو وائرس ہے۔ تمام بچوں کو پولیو وائرس سے محفوظ رہنے کا حق ہے اور ہم سب عالمی برادری کے ساتھ مل کر پاکستان کے بچوں کو اس موذی مرض سے محفوظ بنانے میں اپنا کردار ادا کریں گے۔ پولیو کا عالمی دن ہر سال 24 اکتوبر کو منایا جاتا ہے تاکہ پولیو ورکرز کی پولیو کے خلاف کی جانے والی کوششوں کو خراج تحسین پیش کی جاسکے۔ اس سال پولیو کے عالمی دن کو ” انسداد پولیو کے ہیروز” اور "ترقی کی کہانیاں: ماضی اور حال” سے منسوب کیا گیا ہے۔ اس سال پولیوکے عالمی دن کے موقع پر انسداد پولیو ہیروز کو خراج تحسین پیش کیا جارہا ہے۔ بیان میں کہا گیا ہے کہ پولیو ورکرز کو خراج تحسین پیش کرنے کیلئے پاکستان انسداد پولیو پروگرام کے تحت صوبائی سطح پر بھی مختلف پروگراموں کا اہتمام کیا گیا ہے۔
