لاہور۔26اپریل (اے پی پی):چیئرمین مرکزی ریت ہلال کمیٹی پاکستان مولانا سید محمد عبدالخبیر آزاد نے کہا ہے کہ پہلگام حملہ جھوٹ کا پلندہ اور مودی حکومت کی چال ہے،جس کو ہم مسترد کرتے ہیں،علما کرام منبر و محراب کے ذریعے قومی یکجہتی،مذہبی ہم آہنگی اور ملکی وحدت کو پیدا کرنے میں اپنا کردار ادا کریں،وطن عزیز پاکستان میں قیام امن کیلئے علما ومشائخ اور عوام پاکستان اپنا کلیدی کردار ادا کرں ۔
ان خیالات کا اظہار انہوں نے ہفتہ کے روز یہاں مقامی ہو ٹل میں منعقدہ قومی یکجہتی کانفرنس سے خطاب کرتے ہوئے کیا ۔محمد عبدالخبیر آزاد نے کہا کہ بھارت کے حوالے سے حکومت پاکستان نے قومی سلامتی کے اجلاس میں جوفیصلے کیے ہیں وہ پوری قوم کی آواز ہے،ہم ایک متحد قوم بن کر ہی دشمن کو شکست دے سکتے ہیں، بھارت اور مودی کا ناپاک ایجنڈا پاکستان میں نہیں چلنے دیں گے۔
محمد عبدالخبیر آزاد نے کہا کہ پاکستانی قوم ملک کے دفاع اور استحکام کیلئے اپنی بہادر مسلح افواج اور قومی سلامتی کے اداروں کے ساتھ کھڑی ہے، بھارت نے اگر جنگ مسلط کرنے کی کوشش کی تو ہم اپنے سپہ سالار کی قیادت میں بھارت کو منہ توڑ جواب دیں گے۔انہوں نے کہا کہ دہشت گردی وانتہا پسندی کا خاتمہ،تشدد سے پاک معاشرہ،احترام انسانیت اور پیغام پاکستان کا فروغ ہم سب کی ذمہ داری ہے،پاکستان کے استحکام اورخوشحالی کیلئے وزیر اعظم محمد شہباز شریف اور سپہ سالار جنرل عاصم منیر کا کردارقابل تحسین ہے۔
انہوں نے کہا کہ ریاست، پاکستانی عوام اور امت مسلمہ اہل فلسطین اور غزہ کے مسلمانوں کے ساتھ کھڑی ہے،پرامن احتجاج ہمارا حق ہے،اپنے ملک کی املاک کو نقصان پہنچانا دشمن کو فائدہ پہنچانے کے مترادف ہے۔ انہوں نے کہا کہ وہ وزیر اعلی پنجاب مریم نواز شریف کا شکریہ ادا کرتے ہیں،وہ شب و روز پنجاب کی ترقی و خدمت میں پیش پیش ہیں۔
محمد عبدالخبیر آزاد نے مزید کہا کہ صاف ستھرا پنجاب،خواتین کے حقوق،پنجاب تعمیر و تعلیم،صحت کی بہترین سہولتیں،مذہبی ہم آہنگی اورامن کے قیام میں ان کی کاوشیں قابل تحسین ہیں، جنہوں نے قومی یکجہتی کانفرنس کو کامیاب کروانے میں ہمارا ساتھ دیا۔کانفرنس سے دیگر علمائے کرام اور مختلف شعبہ ہائے زندگی کے اکابرین نے بھی خطاب کیا ۔ کانفرس میں بڑی تعداد میں علمائے کرام، ضلعی انتظامیہ، پولیس افسران اور مختلف شعبہ ہائے زندگی کے اکابرین نے بھی شرکت کی۔
Short Link: https://urdu.app.com.pk/urdu/?p=588201
