اسلام آباد۔2جولائی (اے پی پی):وفاقی وزارت بین الصوبائی رابطہ (آئی پی سی)اور پاکستان سپورٹس بورڈ (پی ایس بی) کی معاونت سے وفاقی تعلیمی اداروں (ایف ڈی ای )کے طلبا و طالبات کے لئے پہلی بار سمر سپورٹس کیمپ کا انعقاد کیا گیا ہے جس میں تمام تعلیمی زونز کے طلبا شامل ہو رہے ہیں۔ پاکستان سپورٹس کمپلیکس میں جاری اس دو ہفتے کے تربیتی کیمپ میں چار انڈور کھیلوں والی بال، ٹیبل ٹینس، شطرنج اور بیڈمنٹن کی تربیت دی جا رہی ہے۔ کیمپ 30 جون سے 11 جولائی تک جاری رہے گا۔ طالبات کا سیشن صبح 9 سے ساڑھے 10 بجے تک جبکہ طلبہ کا سیشن ساڑھے 10 بجے سے 12 بجے تک منعقد ہو رہا ہے جس کی نگرانی پی ایس بی کے ماہر کوچز کر رہے ہیں۔ ابتدائی اندازے کے مطابق 350 سے 400 طلبہ کی شرکت متوقع تھی
تاہم توقعات سے بڑھ کر 500 سے زائد طلبہ کی شرکت نے اس کیمپ کی کامیابی کو نمایاں کر دیا ہے اور روزانہ کی بنیاد پر مزید طلبہ کی رجسٹریشن جاری ہے۔ طلبہ کی حوصلہ افزائی کے لئے وزارت آئی پی سی کے تعاون سے شرکاء میں ٹریک سوٹ بھی تقسیم کئے جا رہے ہیں۔ اس کے ساتھ ساتھ ایریا ایجوکیشن آفیسرز کی جانب سے طلباء کے لئے پک اینڈ ڈراپ سروسز کا بندوبست بھی کیا گیا ہے جو اس شاندار کاوش کو مزید قابلِ تحسین بناتا ہے۔ سپورٹس کیمپ کے ذریعے نہ صرف بچوں کو سکرینز سے دور لا کر عملی سرگرمیوں کی جانب راغب کیا جا رہا ہے بلکہ ان کے اندر نظم و ضبط، صحت مندانہ مقابلے اور ٹیم ورک جیسے اوصاف بھی پروان چڑھ رہے ہیں۔ یہ کیمپ وفاقی دارالحکومت میں صحت مند سرگرمیوں کے فروغ کی ایک بہترین مثال ہے۔
اس کے کامیاب انعقاد پر طلبا کے والدین نے وزارت آئی پی سی ، پی ایس بی ، ایریا ایجوکیشن آفیسرز اور دیگر منتظمین کو بھرپور خراج تحسین پیش کیا ہے ۔
