ڈیرہ اسماعیل خان۔ 01 مئی (اے پی پی):وفاقی وزیر مملکت برائے تخفیف غربت وسماجی تحفظ فیصل کریم کنڈی نے کہا ہے کہ پی پی پی کی لیڈر شپ سیاسی جماعتوں میں مذاکرات کی حامی و داعی ہے ، اتحادی جماعتوں کے مذاکرات پر تحفظات حقیقت پر مبنی ہیں ، پرویز الٰہی کے گھر پر حملہ قابل مذمت ہے ۔ان خیالات کا اظہار انہوں نے سیلاب سے متاثرہ چشمہ رائیٹ بنک کینال کی مرمت و بحالی کے منصوبے کے تیسرے اور آخری مرحلہ کے افتتاح کے موقع پر کیا۔
وفاقی وزیر مملکت برائے آبی وسائل و پی پی پی خیبرپختونخواہ کے صوبائی صدر محمد علی باچا ، خیبرپختونخواہ اسمبلی میں پیپلزپارٹی کے سابق ڈپٹی پارلیمانی لیڈر احمد کریم کنڈی ، صوبائی سیکرٹری اطلاعات امجد آفریدی اور فنانس سیکرٹری فرزند خان وزیر بھی انکے ہمراہ تھے۔ فیصل کریم کنڈی نے کہا کہ ملک میں مذاکرات کے ذریعے مسائل کے حل کے متقاضی ہیں، عمران خان کا ماضی کا ٹریک ریکارڈ مذاکرات کے حوالے سے خوش آئند نہیں ہے تاہم ہم مذاکرات کی کامیابی کے حوالہ سے بہتر امید رکھتے ہیں ، پی پی پی کی لیڈر شپ سیاسی جماعتوں میں مذاکرات کی حامی و داعی ہے ، اتحادی جماعتوں کے مذاکرات پر تحفظات حقیقت پر مبنی ہیں ۔
انہوں نے کہا کہ عمران خان ایک جانب جلد الیکشن کی ڈیمانڈ کرتے ہیں تو دوسری جانب دواسمبلیوں کی بحالی کی باتیں کرتے ہیں ، پرویز الہی کو پہلے عمران خان ڈاکو کہا کرتے تھے اور کل انکے حق میں اپنے دعوں کی نفی کررہے تھے ۔ انہوں نے کہا کہ پرویز الٰہی کے گھر پر حملہ قابل مذمت ہے ، ماضی میں بھی گرفتاریاں ہوئیں ، صدر زرداری، فریال تالپور اور خورشید شاہ نے گرفتاریاں دیں اور عدالتوں کاسامنا کیا ۔ انہوں نے کہا کہ چشمہ رائیٹ بنک کینال کے آخری تین فیزز کے ٹینڈر ہوگئے ہیں یہ کام ایک ماہ میں کام مکمل ہوگا۔
وفاقی وزیر مملکت برائے آبی وسائل محمد علی باچا نے اس موقع پر کہا کہ چشمہ رائیٹ بنک کینال ہمارے شہید قائد ذوالفقار علی بھٹو کی نشانی ہے اور آج اسکی بحالی کا کریڈٹ بھی پی پی پی کو جاتا ہے ۔ انہوں نے کہا کہ گزشتہ سیلاب کی وجہ سے سی آر بی سی کی تباہی سے مقامی زمیندار بری طرح متاثر ہورہے تھے۔ وفاقی حکومت نے مالی مشکلات کے باوجود سی آر بی سی کیلئے پہلے مرحلہ میں دوسوملین کی لاگت سے بحالی کا کام مکمل کیا اور اب پانچ سو ملین کی لاگت سے تیسرے اور آخری مرحلہ کا کام ایک ماہ میں مکمل ہوگا۔
انہوں نے کہا کہ پی پی پی دعووں کے بجائے عملی اقدامات پر یقین رکھتی ہے ، ڈیرہ اسماعیل خان کے اس منصوبہ کے حوالے سے فیصل کریم کنڈی ، احمد کریم کنڈی کا ان پر شدید دبائو تھا اور وفاقی وزیر خورشید شاہ نے بھی اس بارے بھرپور دلچسپی لی اور آج ہم اسکا افتتاح کررہے ہیں ۔ واضح رہے کہ وفاقی حکومت کی جانب سے سیلاب سے متاثرہ چشمہ رائیٹ بنک کینال کی مرمت و بحالی کے لیئے سات سو ملین روپے مختص کیے گئے ہیں۔
