لاہور۔25اگست (اے پی پی):پی ڈی ایم اے پنجاب نے مون سون فلڈ کی صورتحال بارے فیکٹ شیٹ جاری کردی ،اس میں مون سون بارشوں، دریائوں، ڈیمز اور سیلابی صورتحال بارے اعدادوشمار شامل ہیں ۔ ترجمان کے مطابق صوبے بھر میں مون سون بارشوں کا آٹھواں سپیل جاری ہے، گزشتہ 24 گھنٹوں میں نارووال 27 ملی میٹر، سیالکوٹ 5، قصور 4، لاہور اور گوجرانولہ 3 جبکہ گجرات اور خانیوال میں1 ملی میٹر تک بارش ریکارڈ کی گئی۔ آئندہ 24 گھنٹوں میں پنجاب کے بیشتر اضلاع میں شدید مون سون بارشیں متوقع ہیں، بارشوں کا آٹھواں سپیل 27 اگست تک جاری رہے گا ۔
انہوں نے بتایا کہ بالائی پنجاب کے اضلاع مری، راولپنڈی، اٹک، جہلم اور چکوال میں طوفانی بارشوں کی پیشگوئی ہے۔ادھر، ڈی جی پی ڈی ایم اے عرفان علی کاٹھیا نے انتظامیہ کوہائی الرٹ رہنے کی ہدایات جاری کر دی ہیں۔ انہوں نے کہا کہ دریائے سندھ میں کالاباغ اور چشمہ کے مقام پر نچلے درجے کی سیلابی صورتحال ہے،دریائے سندھ میں تربیلا اور تونسہ کے مقام پر پانی کا بہائو نارمل سطح پر ہے، دریائے ستلج میں گنڈا سنگھ والا کے مقام پر اونچے درجے جبکہ سلیمانکی کے مقام پر درمیانے درجے کا سیلاب ہے،دریائے چناب میں مرالہ اور خانکی کے مقام پر درمیانے درجے کی سیلابی صورتحال ہے۔
عرفان علی کاٹھیا نے کہا کہ تربیلا ڈیم 100 فیصد جبکہ منگلا ڈیم 76 فیصد تک بھر چکاہے۔ بھارتی ڈیمز میں بھاکڑا 80، پونگ 87 اور تھین ڈیم 85 فیصد تک بھر چکا ہے ۔انہوں نے کہا کہ بارش کے دوران ریسکیو و ریلیف ادارے فیلڈ میں موجود رہیں، شہریوں سے اپیل ہے کہ موسم برسات میں احتیاطی تدابیر اختیار کریں، بچوں کا خیال رکھیں، انہیں برساتی نالوں ،نشیبی علاقوں ،دریائوں اور نہروں میں ہرگز مت نہانے دیں۔ ان کا کہنا تھا کہ گزشتہ 24 گھنٹوں میں پنجاب میں مون سون بارشوں کے باعث کوئی جانی و مالی نقصان رپورٹ نہیں ہوا ۔
