پشاور۔ 06 جولائی (اے پی پی):پی ڈی ایم اے نے تیز بارشوں اور فلش فلڈ کے باعث صوبہ میں جانی و مالی نقصانات کی رپورٹ جاری کردی۔ صوبہ خیبرپختونخوا میں پچھلے 24 گھنٹوں کے دوران ہونے والی تیز بارشوں اور فلش فلڈ کے باعث مختلف حادثات کے نتیجے میں مجموعی طور پر 4 افراد جاں بحق جبکہ ایک زخمی ہوگیا ہے۔
ترجمان پی ڈی ایم اے کے مطابق جاں بحق افراد میں ایک مرد ، 2 خواتین اور ایک بچہ، جبکہ زخمیوں میں 2 بچے شامل ہیں۔ پی ڈی ایم اے کی رپورٹ کے مطابق بارش/فلش فلڈ کے باعث مجموعی طور پر ایک گھر مکمل طور پر منہدم ہوا جبکہ حادثات صوبہ کے مختلف اضلاع بونیر، ملاکنڈ اور مانسہرہ میں پیش آئے۔
پی ڈی ایم اے کی جانب سے متعلقہ ضلعی انتظامیہ کو متاثرہ خاندان کو فوری طور پر امداد اور زخمیوں کو بہترین طبی سہولیات کی فراہمی یقینی بنانے کی ہدایت کی گئی ہے۔ بارشوں کا سلسلہ 11 جولائی تک جاری رہنے کا امکان ہے۔
پی ڈی ایم اے نے پہلے ہی سے ضلعی انتظامیہ کو الرٹ رہنے اور پیشگی اقدامات اٹھانے کے لیے مراسلہ جاری کیا ہوا ہے۔ انہوں نے کہا کہ ضلعی انتظامیہ، متعلقہ اور امدادی اداروں کے ساتھ مسلسل رابطے میں ہے۔ پی ڈی ایم اے کا ایمرجنسی اپریشن سنٹر مکمل طور پر فعال ہے، عوام کسی بھی نا خوشگوار واقعے کی اطلاع 1700 پر دیں۔
