پیرس۔26جولائی (اے پی پی):پیرس اولمپکس گیمز میں شائقین کو انتہائی دلچسپ اور کانٹے دار مقابلے دیکھنے کو ملیں گے۔ مردوں کے فیلڈ ہاکی ایونٹ میں 27جولائی کو 6میچز کھیلے جائیں گے۔تین میچز گروپ اے سے ہوں گے جبکہ تین میچز گروپ بی کے کھیلے جائیں گے۔
گروپ اے کا پہلا میچ انگلینڈ اور سپین کی ٹیموں کے درمیان کھیلا جائے گا، دوسرا میچ نیدرلینڈز اور جنوبی افریقا کی ٹیموں کے درمیان کھیلا جائے گا جبکہ تیسرے میچ میں جرمنی اور میزبان فرانس کی ٹیمیں پنجہ آزمائی کریں گی۔ اسی طرح گروپ بی کا پہلا میچ بیلجیم اور آئرلینڈ کی ٹیموں کے درمیان کھیلاجائے گا، دوسرے میچ میں آسٹریلیا اور ارجنٹائن کی ٹیمیں آمنے سامنے ہوں گی جبکہ اسی گروپ کے تیسرے اور آخری میچ میں بھارت اور نیوزی لینڈ کی ٹیمیں پنجہ آزمائی کریں گی۔
مردوں کے فیلڈ ہاکی ایونٹ میں 12 ٹیموں کو دو گروپس میں تقسیم کیا گیا ہے ۔ گروپ اے میں نیدرلینڈز،جرمنی،انگلینڈ،سپین،میزبان فرانس اور جنوبی افریقا شامل ہیں۔ گروپ بی میں بیلجیم ،بھارت،آسٹریلیا،ارجنٹائن،نیوزی لینڈ اور آئرلینڈ شامل ہیں۔ مینز فیلڈ ہاکی ایونٹ کے چاروں کوارٹر فائنلز 4 اگست کو کھیلے جائیں گے،سیمی فائنلز 6 اگست کو کھیلے جائیں گے ، تیسری پوزیشن کے لئے میچ 8 اگست کو کھیلا جائے گا جبکہ طلائی تمغہ کے لئے میچ بھی8 اگست کو کھیلا جائے گا۔
