اسلام آباد۔21مارچ (اے پی پی):چیئرمین سینیٹ سید یوسف رضا گیلانی نے بلوچستان میں آپریشن کے دوران جامِ شہادت نوش کرنے والے باغ، آزاد کشمیر کے سپوت میجر سعد بن نذیر کی شہادت پر گہرے دکھ اور افسوس کا اظہار کیا ہے۔
سینیٹ سیکرٹریٹ کے مطابق چیئرمین سینیٹ نے شہید میجر سعد بن نذیر کی جرأت، بہادری اور مادرِ وطن کے لئے ان کی عظیم قربانی کو خراجِ عقیدت پیش کیا۔انہوں نے کہا کہ شہید میجر سعد بن نذیر کی شہادت پوری قوم کے لئے فخر کا باعث ہے اور ان کی بے مثال قربانی ہمیشہ یاد رکھی جائے گی۔
شہید میجر سعد بن نذیر سابق وزیرِاعظم آزاد کشمیر سردار تنویر الیاس کی اہلیہ کے بھانجے تھے۔ چیئرمین سینیٹ نے سابق وزیرِاعظم آزاد کشمیر اور شہید کے اہلِخانہ سے دلی تعزیت اور ہمدردی کا اظہار کیا۔سید یوسف رضا گیلانی نے کہا کہ پاک فوج کے بہادر جوان ملک کی سلامتی اور بقا ء کے لئے اپنی جانوں کا نذرانہ پیش کر رہے ہیں اور پوری قوم ان کی قربانیوں کی مقروض ہے۔
انہوں نے مزید کہا کہ دہشت گردی کے خلاف جنگ میں ہماری مسلح افواج کے بہادر سپوتوں کی قربانیاں رائیگاں نہیں جائیں گی اور دشمن کے ناپاک عزائم کو ہمیشہ ناکام بنایا جائے گا۔چیئرمین سینیٹ نے دعا کی کہ اللہ تعالیٰ شہید میجر سعد بن نذیر کے درجات بلند فرمائے اور ان کے اہلِخانہ کو صبر جمیل عطا کرے۔
Short Link: https://urdu.app.com.pk/urdu/?p=575123
