اسلام آباد۔24فروری (اے پی پی):چیئرمین واپڈا انجینئر لیفٹیننٹ جنرل (ر)سجاد غنی نے مہمند ڈیم پراجیکٹ کا دورہ کیا اور سپل وے، اپ سٹریم اور ڈاؤن سٹریم کوفر(عارضی)ڈیمز، ڈائی ورشن ٹنلز، پاور ہائوس اور پاو ر ان ٹیک پر تعمیراتی کام کاجائزہ لیا۔ پیر کو یہاں جاری پریس ریلیز کے مطابق اس موقع پر چیئرمین واپڈا کو منصوبے کے جاری ترقیاتی اقدامات پر بریفنگ دیتے ہوئے بتایا گیا کہ گزشتہ سال اگست میں دریائے سوات کا رخ موڑے جانے کے بعد مہمند ڈیم پراجیکٹ کی تمام اہم سائٹس پر تعمیراتی کام تیزی سے جاری ہے جبکہ پراجیکٹ کی تکمیل 2026-27 میں متوقع ہے ۔
جنرل منیجر، پراجیکٹ ڈائریکٹر مہمند ڈیم پراجیکٹ نے کنسلٹنٹس اور کنٹریکٹرز کے ہمراہ چیئرمین واپڈا کو مختلف سائٹس پر اہداف اور اب تک ہونے والی پیش رفت کے حوالے سے بریفنگ دی۔ بریفنگ کے دوران بتایا گیا کہ سپل وے پر کنکریٹ کا کام جاری ہے اور یہ اپنے مقررہ شیڈول سے آگے ہے۔ ڈائون سٹریم کوفر (عارضی) ڈیم مقررہ بلندی تک پہنچ چکا ہے جبکہ اپ سٹریم کوفر(عارضی) ڈیم رواں سال اپریل میں اپنی انتہائی سطح یعنی سطح سمندر سے 414 میٹر کی بلندی تک پہنچ جائے گا۔ مین ڈیم کی تعمیر کیلئے کھُدائی اور سلوپس کو ملانے کا کام جاری ہے۔ علاوہ ازیں پاور ٹنل، پن سٹاک اور شافٹ ٹنلز پر بھی کھدائی کا عمل جاری ہے جبکہ اری گیشن ٹنلز کی کھدائی
اور چٹانوں کو مضبوط بنانے کے ساتھ ساتھ بائیں جانب واقع مین کینال پربھی تعمیراتی کام ہو رہا ہے۔ پراجیکٹ سائٹس کے دورے کے بعد چیئرمین واپڈا نے پراجیکٹ آفس میں ایک اجلاس کی صدارت کی۔ اجلاس میں چیئرمین کومین ڈیم کی تکمیل کے لئے درکار میٹریل کی فراہمی ، لارج سکیل ایکسل مشین ٹیسٹنگ ، پراجیکٹ کے الیکٹرو مکینیکل ڈیزائن اور مینوفیکچرنگ سے متعلق بریفنگ دی گئی۔ اس موقع پر گفتگو کرتے ہوئے چیئرمین نے مہمند ڈیم کی بروقت تکمیل کیلئے درکار میٹریل کی فراہمی اور اسے ذخیرہ کرنے کی اہمیت کو اجاگر کرتے ہوئے کنٹریکٹرز کو ہدایت کی کہ اس ضمن میں مذکورہ اہداف حاصل کرنے کے لئے اضافی وسائل بروئے کار لائے جائیں۔
انہوں نے پراجیکٹ حکام ، کنسلٹنٹس اور کنٹریکٹرز کو تاکید کی کہ پراجیکٹ کی ٹائم لائنز کے مطابق تکمیل اورتعمیراتی معیار کو ہر صورت یقینی بنایا جائے۔ یہ بات قابل ذکر ہے کہ مہمند ڈیم صوبہ خیبرپختونخوا کے ضلع مہمند میں دریائے سوات پر تعمیر کیا جا رہا ہے۔
یہ ڈیم دنیا کا پانچواں بلند ترین سی ایف آر ڈی (کنکریٹ فیس راک فل) ڈیم ہے۔ مہمند ڈیم کی تکمیل پر 1.29 ملین ایکڑ فٹ پانی ذخیرہ ہونے سے مہمند اور چارسدہ کے اضلاع کی 18 ہزار233 ایکڑ نئی اراضی زیرکاشت آئے گی جبکہ ایک لاکھ 60 ہزار موجودہ اراضی کے لئے بھی پانی دستیاب ہوگا۔ منصوبے سے بجلی پیدا کرنے کی صلاحیت 800 میگا واٹ ہے جس سے سالانہ 2 ارب86 کروڑ یونٹ بجلی پیدا ہوگی۔ مہمند ڈیم کی بدولت پشاور شہر کو یومیہ 300 ملین گیلن پینے کا پانی مہیا کیا جائے گا۔
Short Link: https://urdu.app.com.pk/urdu/?p=565530
