لاہور۔18 جولائی (اے پی پی )بحریہ ٹاﺅن لاہور کی انتظامیہ نے چیمپئنز ٹرافی جیتنے والی قومی کرکٹ ٹیم کے اعزاز میں بحریہ ٹاﺅن لاہور میں استقبالیہ دیا جس میں قومی ٹیم کے اراکین ،پی سی بی آفیشلز ،سابق کرکٹرز اور دیگر اہم شخصیات نے شرکت کی جبکہ جنید خان‘محمد عامر‘ محمد حفیظ ‘ شعیب ملک ذاتی مصروفیات کے باعث تقریب میں شرکت نہ کر سکے۔ تقریب میں قومی ٹیم کے کپتان سرفراز احمد کو دس لاکھ اور ایک سو پچیس گز کا پلاٹ دیا گیا ۔فخر زمان کو ایک کنال کا پلاٹ اور دس لاکھ روپے دیے گئے ،وہاب رہاض کو بھی دس لاکھ روپے جبکہ فاتح ٹیم کے دیگر تمام کھلاڑیوں کو دس‘ دس لاکھ روپے دیئے گئے۔ تقریب سے خطاب کرتے ہوئے قومی کرکٹ ٹیم کے کپتان سرفراز احمد کا کہنا تھا کہ چیمپئنز ٹرافی میں فتح ٹیم ورک اور قوم کی دعاﺅں کی وجہ سے ہوئی،فتح میں ہر کھلاڑی نے اپنا بھرپور کردار ادا کیا،ہماری جیت پر لوگ بہت خوش ہیں ، بھارت سے ہارنے کے بعد پریشان تھے ،چیئرمین پی سی بی اور انضمام الحق نے حوصلہ بڑھایا، تمام کھلاڑیوں نے محنت کی اور اللہ نے جیت سے نوازا ،فخر زمان نے کہا کہ میچ کے دوران بہت پریشر تھا لیکن قوم کی توقعات پر پورا اترنے کے لیے پریشر پر قابو پایا اور پھر اللہ تعالی نے کامیابیوں کی راہ پر گامزن کردیا ۔
Short Link: https://urdu.app.com.pk/urdu/?p=62791
