اسلام آباد۔29اگست (اے پی پی):وزارتِ توانائی (پاور ڈویژن) نے کہا ہے کہ ڈسکوز کی فیلڈ ٹیمیں دن رات بحالی کے کام میں مصروف ہیں اور متاثرہ علاقوں میں بجلی کی فراہمی جلد از جلد مکمل بحال کر دی جائے گی ۔
سیلاب سے متاثرہ علاقوں میں بجلی کی بحالی کی جمعہ کو جاری پیش رفت رپورٹ میں کہا ہے کہ حالیہ بارشوں اور سیلاب سے پیسکو کے علاقے سوات، بونیر، شانگلہ، صوابی اور ڈی آئی خان کے 12 گرڈز اور 91 فیڈرز متاثر ہوئے جن میں سے پیسکو کے 79 فیڈرز مکمل اور 12 جزوی طور پر بحال کر دیئے گئے ہیں۔ اسی طرح گیپکوکے زیرِ انتظام علاقوں سیالکوٹ، نارووال، وزیرآباد اور حافظ آباد کے 10 گرڈز اور 86 فیڈرز متاثر ہوئے تھے جن میں سے 62 فیڈرز مکمل اور 19 جزوی طور پر بحال کئے جا چکے ہیں۔
مزید برآں لیسکو میں لاہور، قصور اور اوکاڑہ کے 46 متاثرہ فیڈرز جزوی طور پر بحال ہیں جبکہ مکمل بحالی 31 اگست سے یکم ستمبر تک متوقع ہے۔
پاور ڈویژن نے کہا ہے کہ فیسکو کے زیرِ انتظام علاقوں چنیوٹ، جھنگ، سرگودھا، میانوالی اور ڈی آئی خان کے 15گرڈ اور 43 متاثرہ فیڈرز عارضی طور پر بحال ہیں، میپکو کے زیرِ انتظام علاقوں میں 11 گرڈز اور 63 فیڈرز متاثر اور میپکو کے زیرِ انتظام علاقوں میں پانی اترتے ہی متاثرہ فیڈرز کی بحالی کا عمل فوری شروع ہو کر دیا جائے گا۔
ٹیسکو کے علاقے شمالی وزیرستان کے 2 متاثرہ فیڈرز عارضی طور پر بحال کر دیے گئے ہیں جن کی مکمل بحالی 5 ستمبر تک متوقع ہے۔ پاور ڈویژن نے کہا ہے کہ ڈسکوز کی فیلڈ ٹیمیں دن رات بحالی کے کام میں مصروف ہیں اور متاثرہ علاقوں میں بجلی کی فراہمی جلد از جلد مکمل بحال کر دی جائے گی۔
