سیالکوٹ۔4مئی (اے پی پی):صوبائی وزیر بلدیات پنجاب میاں ذیشان رفیق نے اپنے کیمپ آفس ڈسکہ میں عوامی مسائل کے حل کیلئے کھلی کچہری منعقد کی اور حلقہ سے آئے عوام کے مسائل سنے۔ ڈسکہ شہر کے تاجران نے بھی درپیش مسائل کا ذکر کیا جس پر صوبائی وزیر بلدیات پنجاب میاں ذیشان رفیق نے مسائل کے فوری حل کیلئے متعلقہ محکموں کو احکامات جاری کئے ۔
اس موقع پر صوبائی وزیر بلدیات نے گفتگو کرتے ہوئے کہا کہ اپنے حلقہ کی عوام کے مسائل ترجیحی بنیادوں پر حل کروں گا ، ڈسکہ شہر کیلئے سٹریٹ لائٹس کا پراجیکٹ مکمل ہونا خوش آئند ہے ، ایسے درجنوں منصوبے لا رہے ہیں جس سے ڈسکہ کی ترقی کا نیا دور شروع ہوگا اور لوگوں کا معیار زندگی بہتر ہو گا ۔
انہوں نے کہا کہ ڈسکہ میں پانچ مختلف سڑکوں اور سیوریج کا کام شروع ہو چکا ہے ، سپورٹس کمپلیکس کا افتتاح بھی عنقریب کر دیا جائے گا جو نوجوانوں کیلئے تحفہ ہے ۔ اس موقع پر صدر پی پی 51 عظیم بٹ، سٹی صدر ڈسکہ و چیئرمین مرکزی انجمن تاجران ڈسکہ محمد افضل منشاء، سابقہ چیئرمین چوہدری رسالت گجر، چوہدری نصراللہ چیمہ ایڈووکیٹ ،پولیٹیکل سیکرٹری سید داؤد شاہ اور دیگر سینئر رہنما بھی موجود تھے۔
Short Link: https://urdu.app.com.pk/urdu/?p=592230
