کراچی۔26مارچ (اے پی پی):وفاقی وزیر بحری امور محمد جنید انوار چوہدری نے کہا ہے کہ ڈنمارک کی پاکستان کے پورٹ سیکٹر میں 2 ارب ڈالر کی سرمایہ کاری کا عمل جاری ہے، پورٹ قاسم کی زمین کو صنعتی استعمال میں لایا جائے گا، زمینوں کو حقیقی سرمایہ کاروں کو شفاف طریقے سے فروخت کریں گے، پورٹ قاسم کی زمینوں پر رئیل اسٹیٹ ڈیلنگ ختم کردی جائے گی، سندھ حکومت کے اشتراک کے بغیر انفراسٹرکچر کی بہتری کے منصوبے نہیں ہوسکتے ۔ انہوں نے یہ بات پورٹ قاسم تعارفی دورہ کے موقع پر میڈیا سے گفتگو کرتے ہوئے کہی۔ انہوں نے کہا کہ ڈنمارک کی پاکستان کے پورٹ سیکٹر میں 2 ارب ڈالر کی سرمایہ کاری کا عمل جاری ہے، ڈنمارک کی سرمایہ کاری حکومت کے ساتھ مل کر تیز بنانے کے لئے فعال ہیں۔
انہوں نے کہا کہ پورٹ قاسم کی زمین کو صنعتی استعمال میں لایا جائے گا،زمینوں کو حقیقی سرمایہ کاروں کو شفاف طریقے سے فروخت کریں گے، پورٹ قاسم کی زمینوں پر رئیل اسٹیٹ ڈیلنگ ختم کردی جائے گی ،جو الاٹی مقررہ وقت میں صنعتیں نہ لگا سکے ان کی الاٹمنٹ منسوخ کردی جائے گی ، پورٹ قاسم کی زمین کا قوانین کی روشنی میں از سر نو تخمینہ لگایا جائے گا ۔
انہوں نے کہا کہ سندھ حکومت، سرمایہ کاروں کو دعوت دیتے ہیں کہ کراچی کے انفراسٹرکچر میں وزارت بحری امور کے ساتھ مل کر سرمایہ کاری کریں، وزارت بحری امور کراچی کے انفراسٹرکچر کی بہتری میں اپنا کردار ادا کرنے کے لئے تیار ہے، سندھ حکومت کے اشتراک کے بغیر انفراسٹرکچر کی بہتری کے منصوبے نہیں ہوسکتے ، کراچی کے انفراسٹرکچر کو بہتر بنانے میں وزارت اپنا کردار ادا کرے گی تاہم سندھ حکومت کا اشتراک ناگزیر ہے۔
انہوں نے کہا کہ وزارت بحری امور اور ذیلی اداروں کے معاملات اور منصوبوں کو فاسٹ ٹریک پر بہتر بنایا جائے گا، پورٹ قاسم سمیت کے پی ٹی، پی این ایس سی زمینوں کے لئے کلیئر پالیسی وضع کریں گے۔ انہوں نے کہا کہ وزارت بحری امور میں نچلے گریڈ کے افسران کو ترقی کے مواقع مہیا کریں گے، باہر سے صرف ضرورت پڑنے پر افرادی مہارت شامل کی جائے گی۔
انہوں نے کہا کہ پی این ایس سی کے جہازوں کو فعال مدت پوری کرنے پر فروخت کیا گیا ، ان جہازوں کو بہتر ڈیل کے زریعے نسبتاً نئے جہازوں سے تبدیل کیا جارہا ہے، نئے جہازوں کی شمولیت سے پی این ایس سی کی مسابقت بہتر ہوگی ۔ انہوں نے کہا کہ وزارت بحری امور کے ذیلی اداروں سے ان کے پلان طلب کئے ہیں، ماہانہ بنیادوں پر ان منصوبوں پر پیشرفت کاجائزہ لیا جائے گا، بحری امور کے اداروں کے اسلام آباد سے متعلق امور کو فاسٹ ٹریک پر پورا کرنے کے لئے خصوصی سیل قائم کریں گے۔
Short Link: https://urdu.app.com.pk/urdu/?p=576472
