اسلام آباد۔30اپریل (اے پی پی):وزیراعظم محمدشہبازشریف نے کہا ہے کہ نوجوان افرادی قوت کو ڈیجیٹل تربیت سے آراستہ کرنا حکومت کی اولین ترجیحات میں شامل ہے، ڈیجیٹل سٹارٹ اپس اور بیرونی سرمایہ کاری کےلئے پاکستان موزوں ترین مارکیٹ ہے، ڈیجیٹل انقلاب معیشتوں کو نئی شکل دے رہا ہے۔ان خیالات کا اظہار انہوں نے ڈیجیٹل کواپریشن آرگنائزیشن کی سیکرٹری جنرل دیما الیحییٰ سے گفتگوکرتےہوئے کیا جنہوں نے بدھ کو یہاں ان سے ملاقات کی۔
ملاقات میں وفاقی وزیرِ انفارمیشن ٹیکنالوجی شزہ فاطمہ خواجہ، مشیر وزیرِ اعظم سید توقیر شاہ اور متعلقہ اعلیٰ حکام بھی موجود تھے۔ وزیراعظم نے کہا کہ دنیا بھر سے ایک ہزار سے زائد جدید ٹیکنالوجی کے سرمایہ کار اور پالیسی سازوں کا پاکستان میں جمع ہونا، خطے میں پاکستان کے ڈیجیٹل شعبے میں بڑھتے ہوئے اثر و رسوخ کی علامت ہے۔ پاکستان کا سب سے قیمتی اثاثہ ہماری نوجوان افرادی قوت ہے جسے ڈیجیٹل ہنر و تربیت سے لیس کرنا ہماری اولین ترجیحات میں شامل ہے۔
وزیرِاعظم نے کہاکہ 24 کروڑ کی آبادی والی پاکستانی معیشت ڈیجیٹل اسٹارٹ اپس اور بیرونی سرمایہ کاری کیلئے خطے کی موزوں ترین مارکیٹ ہے۔ حکومت کی کاروبار دوست پالیسیاں اور سرمایہ کاروں کی دی جانے والی سہولیات کا مقصد ملک میں سرمائے کے ساتھ ساتھ جدید ٹیکنالوجی کی منتقلی بھی ہے۔
وزیرِ اعظم نے کہاکہ حکومت نوجوانوں کے لئے ڈیجیٹل ٹیکنالوجی اور سرمایہ کاری کے ایسے منصوبے متعارف کرا رہی ہے جن کے ذریعے نوجوان افرادی قوت کو اپنی توانائیوں کو صحیح سمت میں بروئے کار لانے اور انہیں باعزت روزگار کی فراہمی سے معیشت میں اپنا کلیدی کردار ادا کرنے میں مدد ملے گے۔ وزیر اعظم نے کہا کہ ڈیجیٹل تبدیلی اب کوئی معمولی رجحان نہیں بلکہ ایک ایسا انقلاب ہے جو معیشتوں کو نئی شکل دے رہا ہے ۔ حکومت عالمی سطح پر وقوع پذیر ہونے والی ڈیجیٹل تبدیلی کے ساتھ پاکستان کو ہم آہنگ کرنے کیلئے ہر ممکن اقدام کر رہی ہے۔ ڈیجیٹل شعبے میں براہ راست غیر ملکی سرمایہ کاری کے لئے فورم کا انعقاد اور اس میں بین الاقومی شرکت اس امر کا ثبوت ہے کہ پاکستان عالمی ڈیجیٹل معیشت میں قائدانہ کردار کی صلاحیتوں کا حامل ہے۔
ڈیجیٹل تعاون تنظیم کی سیکرٹری جنرل دیما الیحییٰ نے پاکستان میں ڈیجیٹل شعبے کے پہلے براہ راست غیر ملکی سرمایہ کاری فورم کے انعقاد پر شکریہ ادا کیا اور کہا کہ اسلام آباد میں منعقد ہونے والے فورم کے پہلے اجلاس میں شرکت ان کے لئے اعزاز ہے۔
Short Link: https://urdu.app.com.pk/urdu/?p=590136
