ڈینگی پر قابو پانے کیلئے تمام تر وسائل بروئے کار لائے جا رہے ہیں،ڈپٹی کمشنر راولپنڈی

راولپنڈی ۔26اگست (اے پی پی):ڈپٹی کمشنر راولپنڈی حسن وقار چیمہ نے کہا ہے کہ ڈینگی پر قابو پانے کیلئے تمام تر وسائل بروئے کار لائے جا رہے ہیں ، عوامی تعاون کے بغیر ڈینگی کو شکست دینا ناممکن ہے، ان خیالات کا اظہار انہوں نے اپنے دفتر میں انسداد ڈینگی اجلاس کی صدارت کرتے ہوئے کیا،

اجلاس میں اسسٹنٹ کمشنرز، سی ای او ڈاکٹر اعجاز، فوکل پرسن ڈاکٹر احسان، ڈی ڈی ایچ اوز، انٹامالوجسٹ سمیت دیگر متعلقہ محکموں کے افسران نے شرکت کی، انہوں نے کہا کہ ڈینگی وبا سے متاثرہ یونین کونسلوں پر خصوصی توجہ دی جا رہی ہے، ایس پی او پیز کو مدنظر رکھتے ہوئے مائیکرو پلان تشکیل دیا گیا ہے جس کے تحت یونین کونسل وائز کلین سویپ کیا جا رہا ہے،

انہوں نے محکمہ صحت کے حکام کو ہدایت کی کہ کیس رسپانس کو بروقت پایہ تکمیل تک پہنچایا جائے تاکہ دوسرے لوگوں کو ڈینگی مچھر متاثر نہ کر سکے، انہوں نے کہا کہ افسران فیلڈ وزٹ کر کے سرویلنس کے معیار کو مزید بہتر بنائیں اور لوگوں کو ڈینگی سے بچاؤ کے حوالے سے آگاہی فراہم کریں۔

Short Link: https://urdu.app.com.pk/urdu/?p=382930