کاشتکار برسیم کی کاشت اکتوبر تک مکمل کر لیں، اے ڈی پسرور

سیالکوٹ۔ 01 اکتوبر (اے پی پی):اسسٹنٹ ڈائریکٹر زراعت توسیع پسرور سجاد حیدر نے کہا ہے کہ کاشتکار برسیم کے بہتر پیداوار کے حصول کے لیے برسیم کی کاشت اکتوبر تک مکمل کر لیں۔ انہوں نے کاشتکاروں کو برسیم کی کاشت زیادہ سے زیادہ 15 دسمبر تک مکمل اور شرح بیج 8 کلو گرام فی ایکڑ رکھنے کی ہدایت کرتے ہوئے کہا ہے کہ کاشتکار مقررہ تاریخ سے قبل برسیم کی کاشت کرلیں کیونکہ اس کے بعد کاشت کی صورت میں اچھی پیداوار حاصل نہیں ہو سکتی۔

انہوں نے کہا کہ موسم سرما کے چارہ جات کی کاشت کے وقت ایک بوری ڈی اے پی، ڈیڑھ بوری سنگل سپر فاسفیٹ فی ایکڑ بھی ڈالنا ضروری ہے ،اگر چھٹہ کے ذریعے کھڑے پانی میں بوائی کی جائے تو بوائی کے بعد 7 دن کے وقفہ سے دوبارہ پانی لگانا بھی ضروری ہے ۔ اگر لوسرن کی کاشت کے بعد اگاؤ کم ہو تو پہلا پانی ایک ہفتہ کے وقفہ سے اور دوسرا پانی تین ہفتہ کے وقفہ سے دینا چاہئے۔

انہوں نے کہا کہ برسیم کے بیج کو بوائی سے پہلے جراثیمی ٹیکہ لگانا بھی فائدہ مند ہے جبکہ گزشتہ سال والے برسیم کے کھیت سے 80 کلوگرام مفید جراثیم والی مٹی لا کر اسے ایک ایکڑ کے کھیت میں مکس کرنے سے بھی بہترین نتائج برآمد کئے جا سکتے ہیں۔

Short Link: https://urdu.app.com.pk/urdu/?p=507254