فیصل آباد۔ 07 دسمبر (اے پی پی):فیصل آباد ڈویژن کے تمام اضلاع میں اس وقت کماد کی کٹائی کا عمل عروج پر ہے اسلئے کاشتکار کماد کی کٹائی میں بہت احتیاط برتیں اور کماد کی کٹائی گنے کی اقسام اور فصل کے پکنے کے عمل کو مد نظر رکھ کر کی جائے جبکہ پہلے ستمبر کاشت، مونڈھی فصل اور اگیتی پکنے والی اقسام اس کے بعد درمیانی اور دیر سے پکنے والی اقسام برداشت کی جائیں۔
ڈپٹی ڈائریکٹر محکمہ زراعت توسیع فیصل آباد چوہدری خالد محمود نے کہا کہ کماد کی فصل پر چوہے کے حملے اورگنا گرنے کی صورت میں متاثرہ فصل کو پہلے کاٹا جائے اور گنے کی کٹائی سے قبل آبپاشی کا سلسلہ بھی بند کر دیا جائے۔ انہوں نے کہا کہ گنا کاٹنے کے بعد جلد از جلد قریبی شوگر ملز کو سپلائی کر دیا جانا بھی ضروری ہے تاکہ وزن اور ریکوری میں کمی نہ آ سکے۔
انہوں نے کہا کہ جن کھیتوں میں مونڈھی فصل نہ رکھنی ہو اس کھیت کو فوراً تیار کرکے گندم کی کاشت کا عمل مکمل کر لیا جائے تاکہ گندم کی پیداوار میں کمی کا خدشہ نہ رہے۔انہوں نے مزید کہا کہ مڈھوں میں موجود گڑوؤ ں کی سوئی ہوئی سنڈیوں کی تلفی کیلئے کماد کی فصل کو ایک انچ تک گہرا کاٹاجائے کیونکہ اس سے زیر زمین پڑی آنکھیں زیادہ صحت مند ماحول میں پھوٹ سکتی ہیں۔
Short Link: https://urdu.app.com.pk/urdu/?p=417602
