لاہور۔28ستمبر (اے پی پی):مسیحی برادری سے تعلق رکھنے والے رئیل اسٹیٹ ایجنٹس کے وفد نے جناح ہائوس کا دورہ کیا۔ وفد نے 9 مئی کو ہونیوالی شرپسندی اور تخریب کاری کو بہت افسوسناک قرار دیا اور اس کی شدید الفاظ میں مذمت کی۔ تفصیلات کے مطابق جناح ہائوس کے دورے کے موقع پر مسیحی وفد کے ارکان نے اپنے تاثرات کا اظہار کرتے ہوئے کہا کہ بابائے قوم کے گھر کی ابتر صورتحال دیکھ کر دل نہایت دکھی ہے ، یہ قومی ورثہ تھا مگر اسے بھی نہ چھوڑا گیا۔
انہوں نے کہا کہ 9 مئی کی دہشت گردی ملک کی بدنامی کا باعث بنی، بابائے قوم کے گھر پر حملہ اور پاکستان کے شہدا کی یاگاروں کی بے حرمتی کسی طور بھی قابل قبول نہیں، قومی محسنوں اور محافظوں کی بے توقیری قابل مذمت ہے۔
انہوں نے مطالبہ کیا کہ سانحہ 9 مئی میں ملوث تخریب کاروں کو قانون کے مطابق سخت سزا دی جائے تاکہ مستقبل میں کوئی بھی ایسی تخریب کاری اور شرپسندی کا نہ سوچ سکے۔ مسیحی وفد نے شہدا کی قربانیوں کو خراجِ تحسین پیش کیا اور لواحقین کے ساتھ اظہار یکجہتی کیا۔ مسیحی وفد نے مزید کہا کہ پاک فوج کی بدولت اقلیتوں سمیت تمام پاکستانی پرسکون اور امن والی زندگی گزار رہے ہیں۔
Short Link: https://urdu.app.com.pk/urdu/?p=395764
