کشمیریوں کی جدوجہدِ آزادی کو خراجِ تحسین : نیا نغمہ "انسانوں کے جہاں میں” جاری

اسلام آباد۔4اگست (اے پی پی):یومِ استحصالِ کشمیر کے موقع پر پاک فوج کے شعبہ تعلقات عامہ (آئی ایس پی آر) نے ایک نیا نغمہ "انسانوں کے جہاں میں”جاری کیا ہے، یہ نغمہ کشمیریوں کی جدوجہدِ آزادی کو خراجِ تحسین پیش کرتا ہے اور بھارتی ظلم کے خلاف ایک گونج دار پیغام دیتا ہے۔

تفصیلات کے مطابق اس نغمہ میں مقبوضہ کشمیر میں بھارتی مظالم اور حیوانیت کو اجاگر کرتے ہوئے عالمی ضمیر کو جھنجھوڑنے کی کوشش کی گئی ہے۔ یہ جنت نظیر وادی کشمیر کو غیر قانونی بھارتی تسلط سے آزاد کرانے کے لئے کشمیریوں کے عزم کی عکاسی کرتا ہے جو اپنے لہو سے حق کی داستان رقم کر رہے ہیں۔

نغمہ پاکستان کے اس پختہ عزم کی ترجمانی کرتا ہے کہ وہ کشمیریوں کو ان کا حقِ خودارادیت دلانے کے لئے ہمیشہ پرعزم رہے گا۔ ساتھ ہی یہ دنیا کے خاموش تماشائی بننے کے باوجود پاکستان کے کشمیریوں کے شانہ بشانہ کھڑے رہنے کے عہد کو واضح کرتا ہے۔