کنڈیشنز میں تبدیلی کی وجہ سے دورہ انگلینڈ میں مشکل پیش آئے گی، ٹریننگ سے ردہم حاصل کرنے کیلئے محنت کروں گا، شاہین شاہ آفریدی

اسلام آباد ۔ 23 جون (اے پی پی) قومی کرکٹ ٹیم کے فاسٹ باﺅلر شاہین شاہ آفریدی نے کہا ہے کہ کنڈیشنز میں تبدیلی کی وجہ سے دورہ انگلینڈ میں مشکل پیش آئے گی تاہم ٹریننگ سے ردہم حاصل کرنے کیلئے محنت کروں گا، کوشش ہو گی کہ گذشتہ سیریز کی کارکردگی انگلینڈ میں بھی دہراﺅں۔ www.cricketpakistan.com.pk میں گفتگو کرتے ہوئے شاہین شاہ آفریدی نے کہا کہ کورونا وائرس کی وجہ سے پیدا ہونے والی صورتحال میں ہمیں مناسب پریکٹس کا موقع نہیں مل سکا، گھر پر ہی جم میں ٹریننگ اور فٹنس پر کام کیا، دورہ انگلینڈ میں گیند کو چمکانے کیلئے تھوک کے استعمال پر پابندی سمیت کنڈیشنز میں تبدیلی سے بھی مشکل پیش آئے گی، البتہ وہاں ٹریننگ کیلئے اچھا وقت میسر ہوگا، میزبان ٹیم کے ویسٹ انڈیز کے خلاف میچز سے بھی نئی کنڈیشنز کو سمجھنے میں مدد ملے گی۔ انہوں نے کہا کہ میں سخت ٹریننگ کا سلسلہ جاری رکھتے ہوئے ردہم حاصل کرنے کی کوشش کروں گا، پاکستان میں منعقدہ گذشتہ دونوں ہوم سیریز کے میچز میں اچھی کارکردگی کا تسلسل برقرار رکھنے کیلیے پرعزم ہوں، کنڈیشنز میں تبدیلی سمیت مختلف مسائل کے حل کیلیے بولنگ کوچ وقار یونس کی رہنمائی حاصل کروں گا، ماضی میں بھی نیٹس میں سابق کپتان سے جو کچھ سیکھااس کا عملی اظہار انگلش ٹیم کے خلاف کرنے کی کوشش کروں گا۔ شاہین آفریدی نے کہا کہ ٹیسٹ کرکٹ میں کسی حریف بیٹسمین کو بھی غیر اہم نہیں سمجھا جا سکتا، کپتان نے جب بھی گیند تھمائی کوشش ہو گی کہ زیادہ سے زیادہ وکٹیں اڑاﺅں، ٹی ٹوینٹی کی طرح ٹیسٹ کرکٹ کا بھی لطف اٹھاتا ہوں، رواں سال ورلڈکپ نہ بھی ہوتو جس فارمیٹ میں بھی ملک کی نمائندگی کا موقع ملے سو فیصد کارکردگی دکھانے کی کوشش کروں گا۔

Short Link: https://urdu.app.com.pk/urdu/?p=203984