ریاض ۔3فروری (اے پی پی):سعودی عرب اور جرمنی کے درمیان شفاف ہائیڈرجن اور ایمونیا کی پیداوار کے لئے ’’سعودیہ- جرمن گرین ہائیڈروجن بریج ‘‘ معاہدے کے لئے ایک مفاہمتی یاد داشت پر دستخط ہو گئے ۔العربیہ کے مطابق اس کا مقصد مملکت میں گرین ہائیڈروجن اور گرین امونیا پیدا کر کے اسے یورپ برآمد کرنا ہے۔
یاد داشت پر سعودی کمپنی "ایکوا پاور” اور جرمن کمپنی "سیفی” نے دستخط کیے۔ دونوں کمپنیاں مشترکہ منصوبوں کو ترقی دیں گی۔ اس کے نتیجے میں سال 2030 تک سعودی عرب سالانہ 2 لاکھ ٹن گرین ہائیڈروجن یورپ کو برآمد کرے گا۔ایکوا پاور کمپنی اس یاد داشت کے تحت گرین ہائیڈروجن اور گرین امونیا کی پیداوار کے اثاثوں کا مرکزی ترقی دہندہ، سرمایہ کار اور محرک کی حیثیت سے کام کرے گی۔
جب کہ "سیفی” کمپنی شریک سرمایہ کار اور اہم خریدار کے طور پر کام کرے گی۔ واضح رہے کہ سیفی کمپنی توانائی کی تجارت کے شعبے میں یورپ کی ایک سب سے بڑی کمپنی ہے۔ یہ جرمنی اور یورپ میں گرین ہائیڈروجن کی مارکیٹنگ کا کام سنبھالے گی۔یہ اقدام سعودی عرب کی جانب سے گرین ہائیڈروجن کی پیداوار اور برآمد کے شعبے میں اپنے مقام کو مضبوط بنانے کی کوششوں کا حصہ ہے۔
یہ تعاون سعودی عرب اور جرمنی کے درمیان توانائی کے شعبے میں ‘سعودی – جرمن مکالمے’ کے تحت دستخط شدہ مفاہمت کی یاد داشت کے مقاصد سے ہم آہنگ ہے۔ اس کا مقصد تجدیدی توانائی اور صاف ہائیڈروجن ٹیکنالوجی کے شعبوں میں شراکت داری کو فروغ دینا ہے۔
Short Link: https://urdu.app.com.pk/urdu/?p=555283
