اسلام آباد۔30نومبر (اے پی پی):وزیراعظم کے نمائندہ خصوصی برائے بین المذاہب ہم آہنگی،مشرق وسطی و اسلامی ممالک وچیئرمین پاکستان علماء کونسل حافظ محمد طاہر محمود اشرفی نے کہا ہے کہ گزشتہ دو دنوں سے پاکستان کو خوشخبریاں مل رہی ہیں ، متحدہ عرب امارات کے ساتھ اربو ں ڈالر کے معاہدے ہوئے،معاہدوں میں وزیراعظم پاکستان اور آرمی چیف بھی موجود تھے۔
جمعرات کو اپنے ویڈیو پیغام میں حافظ طاہر محمود اشرفی نے کہا کہ اس سے پاکستان کی معیشت کو استحکام ملے گا۔اسی طرح کویت میں بھی پاکستان میں سرمایہ کاری کے ایم و یوز سائن ہوئے۔اس سے پاکستان میں سرمایہ کاری میں اضافہ ہوگا۔انہوں نے کہا کہ سعودی عرب کی طرف سے تین ارب ڈالر کے ڈیپازٹ میں ایک سال کی توسیع بھی خوش آئند ہے۔سعودی عرب نے ہمیشہ پاکستان کی ترقی میں حصہ ڈالا ہے جس پر سعودی ولی عہد کا شکریہ ادا کرتے ہیں۔ یہ سب آرمی چیف اور وزیر اعظم پاکستان کی انتھک محنت اور کوششوں کا نتیجہ ہے۔
انہوں نے کہا کہ وزیر اعظم پاکستان اور آرمی چیف کی شب و روز کاوشوں کے نتیجے میں امید ہے کہ مزید سرمایہ کاری میں اضافہ ہوگا۔سرمایہ کاری سہولت کونسل کے بننے کے بعد سے دیگر اسلامی ممالک بھی سرمایہ کاری کر رہے ہیں۔ یہ سپہ سالار پاکستان کے معاشی استحکام کے اقدامات پر اعتماد کا اظہار ہے۔
انہوں نے کہا کہ ذخیرہ اندوذوں کے خلاف کارروائی اور ملک میں میں معاشی استحکام کے لئے آرمی چیف اور وزیر اعظم انوار الحق کاکڑ کی کوششیں لائق تحسین ہیں۔سعودی عرب کویت اور یو اے ای کی قیادت کا شکریہ ادا کرتے ہیں۔
Short Link: https://urdu.app.com.pk/urdu/?p=415348
