فیصل آباد۔ 05 دسمبر (اے پی پی):ڈپٹی ڈائریکٹر پلانٹ پروٹیکشن، پیسٹ وارننگ اینڈ کوالٹی کنٹرول آف پیسٹی سائیڈز محکمہ زراعت فیصل آباد ڈاکٹر عامر رسول نے گندم کی فصل سے جڑی بوٹیوں کی تلفی کےلئے کاشتکاروں کوسپرے کے دوران پانی کی مقدار100سے 120لیٹر فی ایکڑ رکھنے کی ہدایت کی ہے۔
انہوں نے کہا کہ گندم کی فصل میں موجود جڑی بوٹیاں 30سے 40 فیصدتک پیداوار میں کمی کا باعث بنتی ہیں لہٰذا کاشتکار بہتر پیداوار کےلئے جڑی بوٹیوں کی بروقت تلفی یقینی بنائیں۔ انہوں نے کہا کہ گندم کی فصل میں جڑی بوٹیوں کی بروقت تلفی بھر پور پیداوار کی ضامن ہے، اس لئے کاشتکاروں کو چاہیے کہ وہ بمپر کراپ کے حصول کے لئےجدید زرعی آلات کے ذریعے فصل سے جڑی بوٹیوں کی تلفی کی طرف خصوصی توجہ دیں ۔
انہوں نے کہاکہ جڑی بوٹیوں کی تلفی کےلئے پہلی آبپاشی کے فوراً بعد ماہرین زراعت یا محکمہ زراعت کے فیلڈ سٹاف کی مشاورت سے مناسب سپرے کریں اورپانی کی مقدار 100سے120لیٹر فی ایکٹر تک رکھیں۔ انہوں نے کہاکہ نوکیلے پتوں والی جڑی بوٹیوں کے تدارک کےلئے دوسرے پانی کے بعد وتر حالت میں سپرے یقینی بنائیں۔
انہوں نے کہاکہ جڑی بوٹی مار زہروں کے سپرے کےلئے فلیٹ نوزل استعمال کریں اور تیز ہوا یا بارش و دھند کی صورت میں ہرگز سپرے نہ کریں۔ انہوں نے سپرے کیلئے دوپہرکے وقت کو بھی موزوں قرار دیا ہے۔
Short Link: https://urdu.app.com.pk/urdu/?p=416743
