اسلام آباد۔17مارچ (اے پی پی):وزیراعظم کے معاون خصوصی برائے صنعت و پیداوار ہارون اختر خان نے اعادہ کیا کہ حکومت معاشی استحکام، صنعتی ترقی اور کاروبار دوست ماحول کو یقینی بنانے کے لیے پرعزم ہے، انہوں نے سرکاری اور نجی شعبے کے درمیان تعاون کو فروغ دینے پر زور دیا تاکہ طویل المدتی معاشی خوشحالی حاصل کی جا سکے۔
فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کے اجلاس سے خطاب کرتے ہوئے ہارون اختر خان نے وزیراعظم شہباز شریف کے مستحکم اور ترقی پسند معیشت کے وژن پر روشنی ڈالتے ہوئے کہا کہ چیلنجز کے باوجود پاکستان نے نمایاں پیش رفت کی ہے، وزیراعظم کی قیادت میں ملک نے معاشی مشکلات کا مقابلہ کیا ہے، سکیورٹی خدشات پر قابو پایا ہے اور کاروباری تسلسل کو یقینی بنایا ہے۔
انہوں نے کاروباری برادری کو حکومت کی مکمل حمایت کا یقین دلاتے ہوئے پاکستان کی معیشت کی بحالی میں ان کے کلیدی کردار کو تسلیم کیا۔ انہوں نے کہا کہ وزیراعظم کاروبار دوست پالیسیوں کی تشکیل کے خواہاں ہیں اور یہ یقینی بنا رہے ہیں کہ صنعتوں کو درکار سہولیات فراہم کی جائیں تاکہ معاشی توسیع کو فروغ دیا جا سکے۔ ہارون اختر نے وزیراعظم کی جانب سے سمال اینڈ میڈیم انٹرپرائزز ڈویلپمنٹ اتھارٹی (ایس ایم ای ڈی اے) کو فعال کرنے کے اقدامات کو سراہا جو پاکستان کے صنعتی شعبے کی ریڑھ کی ہڈی کی حیثیت رکھتی ہے۔معاشی اصلاحات کے حوالے سے ہارون اختر خان نے بتایا کہ پاکستان نے پالیسی ریٹ کو 22 فیصد سے کم کرکے 12 فیصد کر دیا ہے جو کاروباری طبقے کے لیے ایک بڑی سہولت ہے۔
انہوں نے یہ بھی بتایا کہ پاکستان سٹاک ایکسچینج نے تاریخی بلندی کو چھو لیا ہے جو سرمایہ کاروں کے بڑھتے ہوئے اعتماد کی علامت ہے، اگرچہ موجودہ حکومت کو کمزور کاروباری اعتماد والی معیشت ورثے میں ملی تھی، لیکن حکومت نے مشکل مگر ضروری اقدامات کیے ہیں جن میں بجلی اور گیس کی قیمتوں میں ایڈجسٹمنٹ بھی شامل ہے تاکہ معاشی استحکام کو یقینی بنایا جا سکے۔
خواتین کے حقوق پر بات کرتے ہوئے انہوں نے وزیراعظم کے اس عزم پر زور دیا کہ خواتین کو ورک فورس میں مساوی مواقع فراہم کیے جائیں گے۔ انہوں نے تسلیم کیا کہ پاکستان کی جی ڈی پی میں خواتین کا کردار نمایاں ہے اور حکومت انہیں معیشت میں مزید متحرک کردار ادا کرنے کے لیے سپورٹ کر رہی ہے، اس سلسلے میں مختلف اقدامات کیے جا رہے ہیں تاکہ خواتین مردوں کے شانہ بشانہ کام کر سکیں اور معاشی سرگرمیوں میں صنفی شمولیت کو یقینی بنایا جا سکے۔
ہارون اختر خان نے کاروباری برادری کو یقین دلایا کہ وزیراعظم شہباز شریف جلد ہی صنعتی شعبے کے لیےبجلی کے نرخ میں رعایت سمیت خصوصی مراعات کا اعلان کریں گے۔
Short Link: https://urdu.app.com.pk/urdu/?p=573659
