لاہور۔1ستمبر (اے پی پی):وزیر اعظم محمد شہباز شریف نے کہا ہے کہ سید علی گیلانی کو کشمیر کی تحریک آزادی کے معتبر نام کے طور پر ہمیشہ یاد رکھا جائے گا ، انہوں نے اپنی پوری زندگی اس مقصد کیلئے وقف کر دی ۔
وزیر اعظم آفس میڈیا ونگ کی جانب سے سید علی گیلانی کی تیسری برسی کے موقع پر جاری پیغام میں وزیر اعظم محمد شہباز شریف نے کہاکہ سید علی گیلانی کشمیر کی آزادی کی تحریک کےمعتبر نام کے طور پر ہمیشہ یاد رکھے جائیں گے ،وہ کشمیری تحریک کے عظیم رہنما تھے جن کا جموں و کشمیر کے عوام کے حق خودارادیت پر پختہ یقین تھا ،انہوں نے اپنی پوری زندگی اس مقصد کے لئے وقف کردی۔
وزیراعظم نے کہا کہ کشمیر کے عوام کی آزادی اور ان کی خودارادیت کی جدوجہد کے لئے ان کی خدمات ہمیشہ یاد رکھی جائیں گی ، قید و بند کی تکالیف اور صعوبتیں ان کے عزم کو کمزور نہ کر سکیں ،ان کی قربانیوں کو رائیگاں نہیں جانے دیا جائے گا۔
وزیراعظم محمد شہباز شریف نے کہا کہ کشمیریوں کے حق خودارادیت کے حصول تک اس جدوجہد کو جاری رکھا جائے گا ،پاکستان کشمیریوں کی اخلاقی، سفارتی اور سیاسی حمایت جاری رکھے گا ۔
Short Link: https://urdu.app.com.pk/urdu/?p=499306
