راولپنڈی۔25اپریل (اے پی پی):پاکستان پیپلز پارٹی راولپنڈی کی خاتون رہنما سمیرا گل نے کہا ہے کہ بانی چیئرمین پاکستان پیپلز پارٹی شہید ذوالفقار علی بھٹو کی سیاست ، عوام کی طاقت ، افواج پاکستان کی پیشہ وارانہ صلاحیت اور یکجہتی مودی سرکار کی موت کے ہی مختلف نام ہیں ۔
ان خیالات کا اظہار این اے 56سے پیپلز پارٹی کی سابق امیدوار سمیرا گل نے بینظیر بھٹو کی جائے شہادت پر پاکستان پیپلز پارٹی کے جنرل سیکرٹری ہمایوں خان کے استقبال کے موقع پر کیا۔ انہوں نے کہا کہ شہید ذوالفقار علی بھٹو کی شہادت ہمیشہ پاکستان کے عوام کی امنگوں کی ترجمان ، مملکت خداداد کے استحکام اور افواج پاکستان کی پیشہ وارانہ صلاحیتوں میں اضافے کا عملی اظہار اور نشان رہی ہے۔
انہوں نے کہا کہ مودی سرکار کو یہ یاد رکھنا چاہئے کہ افواج پاکستان کی پیشہ وارانہ تربیت و صلاحیت اور عوام کی پشت پناہی کی طاقتور تکون کے ساتھ طفلانہ چھیڑ خوانی اور بڑھک بازی قیامت بھی برپا کر سکتی ہے ، اس لئے اسرائیل اور بھارت دونوں کو عالمی امن سے کھلواڑ نہیں کرنا چاہئے۔
Short Link: https://urdu.app.com.pk/urdu/?p=588084
